ترا بے مدعا مانگے دعا کیا

ترا بے مدعا مانگے دعا کیا

مرض ہے تندرستی میں دوا کیا

کہیں کیا کیا کیا ہے ہم نے کیا کیا

تجھے اے بے وفا قدر وفا کیا

تبسم ہو جواب مدعا کیا

کہا کیا آپ نے میں نے سنا کیا

کہو آخر ذرا میں بھی تو سن لوں

مری نسبت سنا ہے تم نے کیا کیا

تمہاری مہربانی ہے تو سب ہے

مرا ارمان میرا مدعا کیا

نہ دیکھیں وہ تو اپنا گریہ بے سود

نہ پوچھیں وہ تو اپنا مدعا کیا

چلا تو بھی جو اے دل لینے والے

ہمارے پاس پھر باقی رہا کیا

ادائیں تم کو بخشیں ہم کو آنکھیں

کرے گا اور بندوں سے خدا کیا

جو مجھ کو آپ ہی در سے اٹھا دیں

کوئی رکھے کسی کا آسرا کیا

سمجھتے ہو جو اپنے آپ کو تم

اسے سمجھے گا کوئی دوسرا کیا

کھلاتے ہو قسم ضبط فغاں پر

ذرا سوچو مرض کیا ہے دوا کیا

مرے گھر کو تم اپنا گھر نہ سمجھو

تو ایسی میہمانی کا مزا کیا

صفیؔ خود بینی ٹھہرے جن کا شیوہ

نظر آئے گا ان کو دوسرا کیا

tira be muddaa mange dua kya

maraz hai tandurusti mein dawa kya

kahen kya kya kya hai ham ne kiya kya

tujhe ai be wafa qadar-e-wafa kya

tabassum ho jawab-e-muddaa kya

kaha kya ap ne main ne suna kya

kaho akhir zara mein bhi to sun lun

miri nisbat suna hai tum ne kya kya

tumhari mehrbani hai to sab hai

mira arman mera muddaa kya

na dekhen wo to apna girya be sud

na puchhen wo to apna muddaa kya

chala tu bhi jo ai dil lene wale

hamare pas phir baqi raha kya

adaen tum ko bakhshen ham ko ankhen

karega aur bandon se khuda kya

jo mujh ko ap hi dar se utha den

koi rakhe kisi ka asra kya

samajhte ho jo apne ap ko tum

use samjhega koi dusra kya

khilate ho qasam zabt-e-fughan par

zara socho maraz kya hai dawa kya

mire ghar ko tum apna ghar na samjho

tu aisi mehmani ka maza kya

safi khud bini thahre jin ka shewa

nazar aega un ko dusra kya