بے طلب ایک قدم گھر سے نہ باہر جاؤں

بے طلب ایک قدم گھر سے نہ باہر جاؤں

ورنہ میں پھاند کے ہی سات سمندر جاؤں

داستانیں ہیں مکانوں کی زبانوں پہ رقم

پڑھ سکوں میں تو مکانوں سے بیاں کر جاؤں

میں منظم سے بھلا کیسے کروں سمجھوتا

ڈوبنے والے ستاروں سے میں کیوں ڈر جاؤں

روح کیا آئے نظر جسم کی دیواروں میں

ان کو ڈھاؤں تو اس آئینے کے اندر جاؤں

اور دو چار مصائب کی کسر باقی ہے

یہ اٹھا لاؤں تو میں دنیا کے سفر پر جاؤں

زہر ہے میرے رگ و پے میں محبت شاید

اپنے ہی ڈنک سے بچھو کی طرح مر جاؤں

تھک کے پتھر کی طرح بیٹھا ہوں رستے میں ظفرؔ

جانے کب اٹھ سکوں کیا جانیے کب گھر جاؤں

be talab ek qadam ghar se na bahar jaun

warna main phand ke hi sat samundar jaun

dastanen hain makanon ki zabanon pe raqam

parh sakun mein to makanon se bayan kar jaun

main munazzam se bhala kaise karun samjhota

dubne wale sitaron se main kyun dar jaun

ruh kya ae nazar jism ki diwaron mein

un ko dhaun to is aine ke andar jaun

aur do char masaib ki kasar baqi hai

ye utha laun to main duniya ke safar par jaun

zahr hai mere rag-o-pe mein mohabbat shayad

apne hi dank se bichho ki tarah mar jaun

thak ke patthar ki tarah baitha hun raste mein zafar

jane kab uth sakun kya janiye kab ghar jaun