بے وفا تجھ سے کچھ گلا ہی نہیں

بے وفا تجھ سے کچھ گلا ہی نہیں

تو تو گویا کہ آشنا ہی نہیں

یا خدا پاس یا بتاں کے پاس

دل کبھو اپنے ہاں رہا ہی نہیں

دل سے جو چاہئے سو باندھئے بات

میں نے واللہ کچھ کہا ہی نہیں

تیرے کوچہ سے آہ جانے کو

دل نہیں یا کہ اپنے پا ہی نہیں

یاں تغافل میں اپنا کام ہوا

تیرے نزدیک یہ جفا ہی نہیں

نامے بلبل نے گو ہزار کئے

ایک بھی گل نے پر سنا ہی نہیں

کچھ نہ ہوتا اثرؔ اثر اس کو

بھلے کو نالہ تو کیا ہی نہیں

be wafa tujh se kuchh gila hi nahin

tu to goya ke ashna hi nahin

ya khuda pas ya butan ke pas

dil kabhu apne han raha hi nahin

dil se jo chahiye so bandhiye bat

main ne wallah kuchh kaha hi nahin

tere kucha se ah jane ko

dil nahin ya ke apne pa hi nahin

yan taghaful mein apna kam hua

tere nazdik ye jafa hi nahin

name bulbul ne go hazar kiye

ek bhi gul ne par suna hi nahin

kuchh na hota asar asar us ko

bhale ko nala to kiya hi nahin