بے خودی میں عجب مزا دیکھا

بے خودی میں عجب مزا دیکھا

سر مخفی کو برملا دیکھا

آپ ہی گل ہی آپ ہی بلبل

اس کو ہر رنگ آشنا دیکھا

کہتا ہے آپ سمجھے بھی ہے آپ

اس کو ہر شے میں خود نما دیکھا

صورت قیس میں ہوا مجنوں

شکل لیلیٰ میں خوش نما دیکھا

آپ ہی بن کے عیسیٰ اور مردہ

آپ ہی آپ کو جلا دیکھا

ہو بر افروختہ بہ صورت شمع

شکل پروانہ میں جلا دیکھا

ساغر بے خودی سے ہو سرشار

ہم نے ہر شے میں اب خدا دیکھا

عالم عشق میں کہیں کیا ہم

جلوۂ حسن جا بجا دیکھا

فیض خادم صفی سے اے آثمؔ

اس کو دیکھا جسے نہ تھا دیکھا

be khudi mein ajab maza dekha

sar-e-makhfi ko barmala dekha

ap hi gul hi ap hi bulbul

us ko har rang ashna dekha

kahta hai ap samjhe bhi hai ap

us ko har shai mein khud numa dekha

surat-e-qais mein hua majnun

shakl-e-laila mein khush numa dekha

ap hi ban ke isa aur murda

ap hi ap ko jala dekha

ho bar afrokhta ba surat-e-shama

shakl-e-parwana mein jala dekha

saghar-e-be khudi se ho sarshar

ham ne har shai mein ab khuda dekha

alam-e-ishq mein kahen kiya ham

jalwa-e-husn ja baja dekha

faiz-e-khadim safi se ai asim

us ko dekha jise na tha dekha