اندمال

شام کی سیڑھیاں کتنی کرنوں کا مقتل بنیں

باد مسموم نے توڑ کر کتنے پتے سپرد خزاں کر دیے

بہہ کے مشکیزۂ ابر سے کتنی بوندیں زمیں کی غذا بن گئیں

غیرممکن تھا ان کا شمار

تھک گئیں گننے والے ہر اک ہاتھ کی انگلیاں

ان گنت کہہ کے آگے بڑھا وقت کا کارواں

ان گنت تھے مرے زخم دل

ٹوٹی کرنوں، بکھرتے ہوئے زرد پتوں، برستی ہوئی بوندیوں کی طرح

اور مرہم بھی ناپید تھا

لیکن اس روز دیکھا جو اک طفل نو زائیدہ کا خندۂ زیر لب

زخم دل مندمل ہو گئے سب کے سب!

sham ki sirhiyan kitni kirnon ka maqtal banen

bad masmum ne tor kar kitne patte supurd-e-khizan kar diye

bah ke mashkiza-e-abr se kitni bunden zamin ki ghiza ban gain

ghairmumkin tha un ka shumar

thak gain ginne wale har ik hath ki ungliyan

an ginat kah ke age barha waqt ka karwan

an ginat the mire zakhm-e-dil

tuti kirnon, bikharte hue zard patton, barasti hui bundiyon ki tarah

aur marham bhi napaid tha

lekin us roz dekha jo ik tifl-e-nau zaida ka khanda-e-zer-e-lab

zakhm-e-dil mundamil ho gae sab ke sab!