بڑھا دی اک نظر میں تو نے کیا توقیر پتھر کی

بڑھا دی اک نظر میں تو نے کیا توقیر پتھر کی

بنا کحل البصر اللہ رے تقدیر پتھر کی

اسیر زلف کیوں کر چھٹ سکیں گے قید وحشت سے

کہ ہے ہر جادۂ دشت جنوں زنجیر پتھر کی

یہ جلوہ ہے کنشت و دیر میں صانع کی قدرت کا

کہ دعوی خدائی کرتی ہے تصویر پتھر کی

تلاش رزق میں ہو آسیا کی طرح سرگرداں

اگر دانا ہے تو بھی سیکھ لے تدبیر پتھر کی

بتا سنگ جراحت آ کے زخم تیغ ابرو پر

ہوا اچھا ترے عاشق کو دی تعزیر پتھر کی

فسون چشم قاتل سے بنا ہوں سحر کا پتلا

جو چھو لے میری گردن کو تو ہو شمشیر پتھر کی

شب فرقت میں جو سوچے تھے کرتے وہ شکایت کیا

نظر کرتے ہی ان پر بن گئے تصویر پتھر کی

نہ نکلی ہے نہ نکلے گی جمی ہے دل میں جو ان کے

مٹانے سے بھی مٹتی ہے کہیں تحریر پتھر کی

سزائے عشق مژگان بتان سنگ دل پائی

ہوئی بارش ہر اک جانب سے ہم پر تیر پتھر کی

نہ فرق آیا حبیبؔ صابر و شاکر کی راحت میں

بنا دنیا میں قسمت کا لکھا تحریر پتھر کی

barha di ik nazar mein tu ne kya tauqir patthar ki

bana kohl albasar allah re taqdir patthar ki

asir-e-zulf kyun kar chhut sakenge qaid-e-wahshat se

ke hai har jada-e-dasht-e-junun zanjir patthar ki

ye jalwa hai kinshat-o-dair mein sane ki qudrat ka

ke daawa-e-khudai karti hai taswir patthar ki

talash-e-rizq mein ho asiya ki tarah sargardan

agar dana hai tu bhi sikh le tadbir patthar ki

bata sang-e-jarahat a ke zakhm-e-tegh-e-abru par

hawa achchha tire ashiq ko di taazir patthar ki

fusun-e-chashm-e-qatil se bana hun sehr ka putla

jo chhu le meri gardan ko to ho shamshir patthar ki

shab-e-furqat mein jo soche the karte wo shikayat kya

nazar karte hi un par ban gae taswir patthar ki

na nikli hai na niklegi jami hai dil mein jo un ke

mitane se bhi mitti hai kahin tahrir patthar ki

saza-e-ishq mizhgan-e-butan-e-sang dil pai

hui barish har ik janib se ham par tir patthar ki

na farq aya habib-e-sabir-o-shakir ki rahat mein

bana duniya mein qismat ka likha tahrir patthar ki