بڑھ گئیں گستاخیاں میری سزا کے ساتھ ساتھ

بڑھ گئیں گستاخیاں میری سزا کے ساتھ ساتھ

پیار آتا ہے تری جور و جفا کے ساتھ ساتھ

ضعف سے راہ محبت میں قدم اٹھتے نہیں

پاؤں جمتے ہیں زمیں پر نقش پا کے ساتھ ساتھ

چھوٹ کر کنج قفس سے نکہت گل کی طرح

ہم بھی اڑ کر جائیں گے باد صبا کے ساتھ ساتھ

سرد آہوں سے پھنکا جاتا ہے سینے میں جگر

آتش غم تیز ہوتی ہے ہوا کے ساتھ ساتھ

میرے آنسو بھی بہے جوش محبت میں عزیزؔ

میرے نالے بھی رہے میری دعا کے ساتھ ساتھ

barh gain gustakhiyan meri saza ke sath sath

pyar ata hai tiri jaur-o-jafa ke sath sath

zof se rah-e-mohabbat mein qadam uthte nahin

paon jamte hain zamin par naqsh-e-pa ke sath sath

chhut kar kunj-e-qafas se nikhat-e-gul ki tarah

ham bhi ur kar jaenge bad-e-saba ke sath sath

sard ahon se phinka jata hai sine mein jigar

atish-e-gham tez hoti hai hawa ke sath sath

mere ansu bhi bahe josh-e-mohabbat mein aziz

mere nale bhi rahe meri dua ke sath sath