اور اب کیا کہیں کہ کیا ہیں ہم

اور اب کیا کہیں کہ کیا ہیں ہم

آپ ہی اپنے مدعا ہیں ہم

اپنے عاشق ہیں اپنے وارفتہ

آپ ہی اپنے دل ربا ہیں ہم

آپ ہی خانہ آپ خانہ خدا

آپ ہی اپنی مرحبا ہیں ہم

عشق جو دل میں درد ہو کے رہا

خود اسی درد کی دوا ہیں ہم

راز دل کی طرح زمانے میں

تھے چھپے آج برملا ہیں ہم

کیوں نہ ہو عرش پر دماغ اپنا

کس کے کوچے کی خاک پا ہیں ہم

ہر کوئی آشنا سمجھتا ہے

اور یاں کس کے آشنا ہیں ہم

ابتدا کی بھی ابتدا ہیں ہم

انتہا کی بھی انتہا ہیں ہم

ہم تو بندے نظامؔ ان کے ہیں

وہ بجا کہتے ہیں "خدا ہیں ہم"

aur ab kya kahen ke kya hain ham

ap hi apne muddaa hain ham

apne ashiq hain apne warafta

ap hi apne dil ruba hain ham

ap hi khana ap khana khuda

ap hi apni marhaba hain ham

ishq jo dil mein dard ho ke raha

khud isi dard ki dawa hain ham

raz-e-dil ki tarah zamane mein

the chhupe aj barmala hain ham

kyun na ho arsh par dimagh apna

kis ke kuche ki khak-e-pa hain ham

har koi ashna samajhta hai

aur yan kis ke ashna hain ham

ibtida ki bhi ibtida hain ham

intiha ki bhi intiha hain ham

ham to bande nizam un ke hain

wo baja kahte hain "khuda hain ham"