بھولا ہوں میں عالم کو سرشار اسے کہتے ہیں

بھولا ہوں میں عالم کو سرشار اسے کہتے ہیں

مستی میں نہیں غافل ہشیار اسے کہتے ہیں

گیسو اسے کہتے ہیں رخسار اسے کہتے ہیں

سنبل اسے کہتے ہیں گلزار اسے کہتے ہیں

اک رشتۂ الفت میں گردن ہے ہزاروں کی

تسبیح اسے کہتے ہیں زنار اسے کہتے ہیں

محشر کا کیا وعدہ یاں شکل نہ دکھلائی

اقرار اسے کہتے ہیں انکار اسے کہتے ہیں

ٹکراتا ہوں سر اپنا کیا کیا در جاناں سے

جنبش بھی نہیں کرتی دیوار اسے کہتے ہیں

دل نے شب فرقت میں کیا ساتھ دیا میرا

مونس اسے کہتے ہیں غم خوار اسے کہتے ہیں

خاموش امانتؔ ہے کچھ اف بھی نہیں کرتا

کیا کیا نہیں اے پیارے اغیار اسے کہتے ہیں

bhula hun main alam ko sarshar use kahte hain

masti mein nahin ghafil hushyar use kahte hain

gesu use kahte hain rukhsar use kahte hain

sumbul use kahte hain gulzar use kahte hain

ik rishta-e-ulfat mein gardan hai hazaron ki

tasbih use kahte hain zunnar use kahte hain

mahshar ka kiya waada yan shakl na dikhlai

iqrar use kahte hain inkar use kahte hain

takrata hun sar apna kya kya dar janan se

jumbish bhi nahin karti diwar use kahte hain

dil ne shab-e-furqat mein kiya sath diya mera

munis use kahte hain gham khwar use kahte hain

khamosh amanat hai kuchh uf bhi nahin karta

kya kya nahin ai pyare aghyar use kahte hain