بگڑ جاتے تھے سن کر یاد ہے کچھ وہ زمانہ بھی

بگڑ جاتے تھے سن کر یاد ہے کچھ وہ زمانہ بھی

کوئی کرتا تھا جب میری شکایت غائبانہ بھی

وہ جس پر مہرباں ہوتے ہیں دنیا اس کی ہوتی ہے

نظر ان کی پلٹتے ہی پلٹتا ہے زمانہ بھی

سنا کرتا ہوں طعنے ہجر میں کیا کیا رقیبوں کے

بنا ہوں اس محبت میں ملامت کا نشانہ بھی

یہاں بھی فرض ہے زاہد ادب سے سر جھکا لینا

مرے نزدیک کعبہ ہے کسی کا آستانہ بھی

فریب دام میں لائی ہے کچھ صیاد کی خاطر

قفس میں کھینچ کر لایا ہمیں کچھ آب و دانہ بھی

جلا کر دل مرا صیاد کا ٹھنڈا کلیجہ کر

کہیں اے برق جلدی پھونک میرا آشیانہ بھی

بگڑتے دیر ہوتی ہے نہ بنتے دیر ہوتی ہے

مزاج یار سے کچھ ملتا جلتا ہے زمانہ بھی

حسیں پڑھ کر غزل میری مرے مشتاق ہوتے ہیں

مسخر دل کو کرتا ہے کلام عاشقانہ بھی

نہ بھولے گی حفیظ احباب کو یہ سرگزشت اپنی

جہاں میں یاد رہ جائے گا کچھ اپنا فسانہ بھی

bigar jate the sun kar yad hai kuchh wo zamana bhi

koi karta tha jab meri shikayat ghaibana bhi

wo jis par mehrban hote hain duniya us ki hoti hai

nazar un ki palatte hi palatta hai zamana bhi

suna karta hun taane hijr mein kya kya raqibon ke

bana hun is mohabbat mein malamat ka nishana bhi

yahan bhi farz hai zahid adab se sar jhuka lena

mire nazdik kaaba hai kisi ka astana bhi

fareb-e-dam mein lai hai kuchh sayyad ki khatir

qafas mein khinch kar laya hamen kuchh ab-o-dana bhi

jala kar dil mira sayyad ka thanda kaleja kar

kahin ai barq jaldi phunk mera ashiyana bhi

bigarte der hoti hai na bante der hoti hai

mizaj-e-yar se kuchh milta jalta hai zamana bhi

hasin parh kar ghazal meri mire mushtaq hote hain

musakhkhar dil ko karta hai kalam-e-ashiqana bhi

na bhulegi hafiz ahbab ko ye sarguzasht apni

jahan mein yad rah jaega kuchh apna fasana bhi