بہار آئی کر اے باغباں گلاب قلم

بہار آئی کر اے باغباں گلاب قلم

کہ لکھے وصف رخ یار کی کتاب قلم

نہ کھینچے چہرۂ پر نور پر نقاب قلم

کرے نہ کاغذ تصویر کو خراب قلم

جو قصد ہو رخ روشن کے وصف لکھنے کا

فلک سے لے ورق ماہ و آفتاب قلم

حکایت دل بیتاب طول رکھتی ہے

نہ کر تو لکھنے میں اتنا بھی اضطراب قلم

بیان زلف چلیپا میں قطعہ لکھ لکھ کر

دکھائے خط شکستہ کا پیچ و تاب قلم

حباب سے بھی بہت کم ہے زیست کا وقفہ

حدیث کشتی مے میں چلے شتاب قلم

لکھے نہ آتش مے کی حکایتیں آگے

جگر نہ بادہ کشوں کے کرے کباب قلم

شبیہ کھینچے گا اک گل کے قد موزوں کی

لکھے گا مصرع شمشاد کا جواب قلم

حکایت شب ہجراں لکھو نہ اے عاجزؔ

ہماری جان حزیں کا نہ ہو عذاب قلم

bahar ai kar ai baghban gulab qalam

ke likhe wasf-e-rukh yar ki kitab-e-qalam

na khinche chehra-e-pur nur par naqab qalam

kare na kaghaz taswir ko kharab qalam

jo qasd ho rukh-e-raushan ke wasf likhne ka

falak se le waraq-e-mah-o-aftab qalam

hikayat-e-dil betab tul rakhti hai

na kar to likhne mein itna bhi iztirab-e-qalam

bayan-e-zulf-e-chalepa mein qita likh likh kar

dikhae khat-e-shikasta ka pech-o-tab qalam

habab se bhi bahut kam hai zist ka waqfa

hadis-e-kashti-e-mai mein chale shitab qalam

likhe na atish-e-mai ki hikayaten age

jigar na bada kashon ke kare kabab qalam

shabih khinchega ik gul ke qad-e-mauzun ki

likhega misra-e-shamshad ka jawab-e-qalam

hikayat-e-shab hijran likho na ai ajiz

hamari jan-e-hazin ka na ho azab-e-qalam