بہ خدا عشق کا آزار برا ہوتا ہے — سرور جہاں آبادی

Arooz is now on the App Store, for iPhone and iPad. Download →

سرور جہاں آبادی

بہ خدا عشق کا آزار برا ہوتا ہے

روگ چاہت کا برا پیار برا ہوتا ہے

جاں پہ آ بنتی ہے جب کوئی حسیں بنتا ہے

ہائے معشوق طرحدار برا ہوتا ہے

یہ وہ کانٹا ہے نکلتا نہیں چبھ کر دل سے

خلش عشق کا آزار برا ہوتا ہے

ٹوٹ پڑتا ہے فلک سر پہ شب فرقت میں

شکوۂ چرخ ستم گار برا ہوتا ہے

آ ہی جاتی ہے حسینوں پہ طبیعت ناصح

سچ تو یہ ہے کہ دل زار برا ہوتا ہے