بھولے پن سے یہ اسے محفل جاناں سمجھا
صفدر مرزا پوریبھولے پن سے یہ اسے محفل جاناں سمجھا
حشر کی خوب حقیقت دل ناداں سمجھا
زندگانی کو خیال شب ہجراں سمجھا
موت آئی تو اسے خواب پریشاں سمجھا
گھر سے تن کر نکل آیا ہو کوئی مست شباب
کون کمبخت گریباں کو گریباں سمجھا
روز آفت ہے نئی روز قیامت ہے نئی
آج تک میں نہ مزاج شب ہجراں سمجھا
میں گنہ گار دم حشر بڑھاتا کیوں ہاتھ
ابر رحمت کو مگر آپ کا داماں سمجھا
ایک مدت ہوئی کہتے ہوئے افسانۂ غم
آج تک وہ نہ مرا حال پریشاں سمجھا
دامن اس شوخ کا سمجھا شفق گلگوں کو
ماہ نو کو کسی مہ وش کا گریباں سمجھا
عکس اس میں نظر آئے جو تری محفل کے
دل حیراں کو میں آئینۂ حیراں سمجھا
میں جو رہ رہ کے سناتا ہوں بیان شب غم
مسکرا کر کوئی کہتا ہے کہ ہاں ہاں سمجھا
خوف کچھ عہد تباہی کا نہ اس کو صفدرؔ
اپنے اللہ کو جو اپنا نگہباں سمجھا
bhule pan se ye use mahfil janan samjha
hashr ki khub haqiqat dil-e-nadan samjha
zindagani ko khayal shab-e-hijran samjha
maut ai to use khwab-e-pareshan samjha
ghar se tan kar nikal aya ho koi mast-e-shabab
kaun kambakht gareban ko gareban samjha
roz afat hai nai roz-e-qayamat hai nai
aj tak main na mizaj-e-shab-e-hijran samjha
main gunah gar dam-e-hashr barhata kyun hath
abr-e-rahmat ko magar ap ka daman samjha
ek muddat hui kahte hue afsana-e-gham
aj tak wo na mira hal-e-pareshan samjha
daman us shokh ka samjha shafaq-e-gulgun ko
mah-e-nau ko kisi mah wash ka gareban samjha
aks is mein nazar ae jo tiri mahfil ke
dil-e-hairan ko main aina-e-hairan samjha
main jo rah rah ke sunata hun bayan-e-shab gham
muskura kar koi kahta hai ke han han samjha
khauf kuchh ahd tabahi ka na us ko safdar
apne allah ko jo apna nigahban samjha