بھڑک اٹھیں گے شعلے ایک دن دنیا کی محفل میں

بھڑک اٹھیں گے شعلے ایک دن دنیا کی محفل میں

کہاں تک جذب ہوں گی بجلیاں صبر آزما دل میں

لہو رونے لگیں گے ساز عشرت چھیڑنے والے

ارے یہ درد آواز شکست شیشۂ دل میں

یہ چھینٹیں خون کی کافی ہیں میرے بخشوانے کو

نظر آتی ہے جنت وسعت دامان قاتل میں

ابد تک کوکب بخت سعادت بن کے چمکیں گے

ہوئے ہیں جذب جو قطرے لہو کے تیغ قاتل میں

جنون بے سر و ساماں کی زینت دیکھنے والے

مبادا فرق آئے عشق کی تدبیر منزل میں

ہزاروں سال سوز دل نے کی تھی دوزخ آشامی

قدم رکھتے ہی میرے لگ گئی اک آگ محفل میں

مگر بھولے نہیں ہو یاد اب تک ابرؔ و حامدؔ کی

عزیزؔ آخر وہ قوت کیوں نہیں باقی رہی دل میں

bharak uthenge shole ek din duniya ki mahfil mein

kahan tak jazb hongi bijliyan sabr azma dil mein

lahu rone lagenge saz-e-ishrat chherne wale

are ye dard awaz-e-shikast-e-shisha-e-dil mein

ye chhinten khun ki kafi hain mere bakhshwane ko

nazar ati hai jannat wusat-e-daman-e-qatil mein

abad tak kaukab-e-bakht-e-saadat ban ke chamkenge

hue hain jazb jo qatre lahu ke tegh-e-qatil mein

junun-e-be sar-o-saman ki zinat dekhne wale

mabada farq ae ishq ki tadbir-e-manzil mein

hazaron sal soz-e-dil ne ki thi dozakh ashami

qadam rakhte hi mere lag gai ik ag mahfil mein

magar bhule nahin ho yad ab tak abr-o-hamid ki

aziz akhir wo quwwat kyun nahin baqi rahi dil mein