بھویں چڑھی ہیں اور ہے تیور جھکا ہوا — مرزا اظفری

Arooz is now on the App Store, for iPhone and iPad. Download →

مرزا اظفری

بھویں چڑھی ہیں اور ہے تیور جھکا ہوا

کچھ آج بولتا ہے وہ ہم سے رکا ہوا

جو چاہتا ہے دل کو مرے دل دہی کرے

سودا یہ ہے قدیم سے یوں ہی چکا ہوا

اوسوں گئی ہے پیاس کہیں دیدۂ نمیں

بجھتا ہے آنسوؤں سے کہاں دل پھنکا ہوا

ایوب صابر اور وو کنعاں کے پیر سے

میرے سے زور و شور کا صبر و بکا ہوا

ان چتونوں چرائے دبے پاؤں اظفریؔ

دیکھو کدھر چلا ہے چھپا اور لُکا ہوا