بہ خدا ہیں تری ہندو بت مے خوار آنکھیں

بہ خدا ہیں تری ہندو بت مے خوار آنکھیں

نشہ کی ڈوری نہیں پہنے ہیں زنار آنکھیں

چشم آہو سے غرض تھی نہ مجھے نرگس سے

تیری آنکھوں سے جو ملتیں نہ یہ دو چار آنکھیں

چار چشم اس لئے کہتا ہے مجھے اک عالم

کہ مری آنکھوں میں پھرتی ہیں تری یار آنکھیں

دیکھتے رہتے ہیں ہم راہ تمہاری صاحب

آپ آتے نہیں آ جاتی ہیں ہر بار آنکھیں

پیار سے میں نے جو دیکھا تو وہ فرماتے ہیں

دیکھیے دیکھیے ہوتی ہیں گنہ گار آنکھیں

چوم لیتے ہیں وہ آئینے میں آنکھیں اپنی

لب مسیحائی کریں گے کہ ہیں بیمار آنکھیں

آگرہ چھوٹ گیا مہرؔ تو چنار میں بھی

ڈھونڈا کرتی ہیں وہی کوچہ و بازار آنکھیں

ba khuda hain tiri hindu but-e-mai khwar ankhen

nasha ki dori nahin pahne hain zunnar ankhen

chashm-e-ahu se gharaz thi na mujhe nargis se

teri ankhon se jo miltin na ye do char ankhen

char chashm is liye kahta hai mujhe ik alam

ke miri ankhon mein phirti hain tiri yar ankhen

dekhte rahte hain ham rah tumhari sahab

ap ate nahin a jati hain har bar ankhen

pyar se main ne jo dekha to wo farmate hain

dekhiye dekhiye hoti hain gunah gar ankhen

chum lete hain wo aine mein ankhen apni

lab masihai karenge ke hain bimar ankhen

agra chhut gaya mehr to chanar mein bhi

dhunda karti hain wahi kucha-o-bazar ankhen