بت پرستی کے صنم خانے کا آثار نہ توڑ

بت پرستی کے صنم خانے کا آثار نہ توڑ

کعبۂ دل مرا مست مئے پندار نہ توڑ

عہد‌ میثاق کا لازم ہے ادب اے واعظ

ہے یہ پیمان وفا رشتۂ زنار نہ توڑ

محتسب سنگ پہ تو شیشۂ مے کو نہ پٹک

دل رندان مے آشام کو زنہار نہ توڑ

رحم کر رحم کہ یہ چشم چمن کا ہے چراغ

جلوۂ گل سے ہے زینت اسے اے یار نہ توڑ

توبہ کرنی تجھے واجب ہی نہ تھی اے ساحرؔ

وہ جو ہونا تھا ہوا اب اسے بے کار نہ توڑ

but parasti ke sanam khane ka asar na tor

kaaba-e-dil mira mast-e-mai-e-pindar na tor

ahd-e-misaq ka lazim hai adab ai waiz

hai ye paiman-e-wafa rishta-e-zunnar na tor

mohtasib sang pe to shisha-e-mai ko na patak

dil-e-rindan-e-mai asham ko zinhar na tor

rahm kar rahm ke ye chashm-e-chaman ka hai charagh

jalwa-e-gul se hai zinat use ai yar na tor

tauba karni tujhe wajib hi na thi ai sahir

wo jo hona tha hua ab use be kar na tor