بت کدہ نزدیک کعبہ دور تھا

بت کدہ نزدیک کعبہ دور تھا

میں ادھر ہی رہ گیا مجبور تھا

شام ہی سے ہم کہیں جاتے تھے روز

مدتوں اپنا یہی دستور تھا

وہ کیا جس میں خوشی تھی آپ کی

وہ ہوا جو آپ کو منظور تھا

کچھ ادب سے رہ گئے نالے ادھر

کیا بتائیں عرش کتنی دور تھا

جس گھڑی تھا اس کے جلوے کا ظہور

عرش کا ہم سنگ کوہ طور تھا

اک حسیں کا آ گیا جو تذکرہ

دیر تک محفل میں ذکر حور تھا

وصل کی شب تھی شب معراج کیا

دور تک پھیلا ہوا اک نور تھا

ہر کس و ناکس سے کیا ملتی نگاہ

اپنی آنکھوں میں بت مغرور تھا

عمر بھر فکر سخن میں تھا حفیظؔ

شاعری کا دل میں اک ناسور تھا

but kada nazdik kaaba dur tha

main idhar hi rah gaya majbur tha

sham hi se ham kahin jate the roz

muddaton apna yahi dastur tha

wo kiya jis mein khushi thi ap ki

wo hua jo ap ko manzur tha

kuchh adab se rah gae nale idhar

kya bataen arsh kitni dur tha

jis ghari tha us ke jalwe ka zuhur

arsh ka ham sang koh-e-tur tha

ik hasin ka a gaya jo tazkira

der tak mahfil mein zikr-e-hur tha

wasl ki shab thi shab-e-meraj kya

dur tak phaila hua ik nur tha

har kis-o-nakas se kya milti nigah

apni ankhon mein but-e-maghrur tha

umr bhar fikr-e-sukhan mein tha hafiz

shayari ka dil mein ik nasur tha