بلبل بجائے اپنے تجھے ہم نوا سے بحث

بلبل بجائے اپنے تجھے ہم نوا سے بحث

واشد میں گل کی محض غلط ہے صبا سے بحث

آئینے کو نہ چاہئے عاشق کے دل کے ساتھ

برعکس اپنی شکل کے روئے صفا سے بحث

اب تو غرور حسن ہے ایسا بتاں تمہیں

مطلق محل خوف نہیں ہے خدا سے بحث

مبحث سے اس مقام کے خارج ہے دخل غیر

جب آشنا کو آن پڑے آشنا سے بحث

بلبل ہزار نغمہ سرا ہوئے باغ میں

کب کر سکے ہے نالۂ دل کی صدا سے بحث

دانا نہ اس کو سمجھئے جو غیر خامشی

دل خستہ ہو فلک کے کرے آسیا سے بحث

کب شمع تیرے حسن کے شعلے کے روبرو

محفل میں کر سکے کم و بیش ضیا سے بحث

توسن نے تیری نازکی گلشن میں ختم کی

آج آب و رنگ گل کی ہوس پر ہوا سے بحث

گلشن میں چاک پیرہن گل کیا محبؔ

بلبل نے کر کے اس بت گلگوں قبا سے بحث

bulbul bajae apne tujhe ham nawa se bahs

washud mein gul ki mahz ghalat hai saba se bahs

aine ko na chahiye ashiq ke dil ke sath

baraks apni shakl ke ru-e-safa se bahs

ab to ghurur-e-husn hai aisa butan tumhen

mutlaq mahal khauf nahin hai khuda se bahs

mabhas se us maqam ke kharij hai dakhl-e-ghair

jab ashna ko an pare ashna se bahs

bulbul hazar naghma sara hue bagh mein

kab kar sake hai nala-e-dil ki sada se bahs

dana na us ko samajhiye jo ghair khamushi

dil khasta ho falak ke kare asiya se bahs

kab shama tere husn ke shole ke rubaru

mahfil mein kar sake kam-o-besh-e-ziya se bahs

tosun ne teri nazuki gulshan mein khatm ki

aj ab-o-rang-e-gul ki hawas par hawa se bahs

gulshan mein chak-e-pairahan-e-gul kiya muhib

bulbul ne kar ke us but-e-gulgun qaba se bahs