اندوہ سے ہوئی نہ رہائی تمام شب

اندوہ سے ہوئی نہ رہائی تمام شب

مجھ دل زدہ کو نیند نہ آئی تمام شب

جب میں شروع قصہ کیا آنکھیں کھول دیں

یعنی تھی مجھ کو چشم نمائی تمام شب

چشمک چلی گئی تھی ستاروں کی صبح تک

کی آسماں نے دیدہ درائی تمام شب

بخت سیہ نے دیر میں کل یاوری سی کی

تھی دشمنوں سے اس کو لڑائی تمام شب

بیٹھے ہی گزری وعدے کی شب وہ نہ آ پھرا

ایذا عجب طرح کی اٹھائی تمام شب

سناہٹے سے دل سے گزر جائیں سو کہاں

بلبل نے گو کی نالہ سرائی تمام شب

تارے سے میری پلکوں پہ قطرے سرشک کے

دیتے رہے ہیں میرؔ دکھائی تمام شب

andoh se hui na rihai tamam shab

mujh dil zada ko nind na ai tamam shab

jab main shuru qissa kiya ankhen khol den

yaani thi mujh ko chashm numai tamam shab

chashmak chali gai thi sitaron ki subh tak

ki asman ne dida darai tamam shab

bakht-e-siyah ne der mein kal yawari si ki

thi dushmanon se us ko larai tamam shab

baithe hi guzri waade ki shab wo na a phira

iza ajab tarah ki uthai tamam shab

sunahate se dil se guzar jaen so kahan

bulbul ne go ki nala sarai tamam shab

tare se meri palkon pe qatre sarishk ke

dete rahe hain mir dikhai tamam shab