بغل میں ہم نے رات اک غیرت مہتاب دیکھا ہے

بغل میں ہم نے رات اک غیرت مہتاب دیکھا ہے

تمہیں اس خواب کی تعبیر ہو کیا خواب دیکھا ہے

تڑپ بجلی کی بھی دیکھی ہے وہ دل تھام لیتے ہیں

تری بے تابیوں کو بھی دل بے تاب دیکھا ہے

وہ الفت دوست ہوں ناصح دعا ہی دل سے نکلی ہے

اگر دشمن کے گھر بھی مجمع احباب دیکھا ہے

خدا کے سامنے اے محتسب سچ بولنا ہوگا

مرے ساغر میں مے دیکھی ہے یا خوں ناب دیکھا ہے

مبارکؔ اضطراب شوق کا عالم نہیں چھپتا

کہ جب دیکھا ہے ہم نے آپ کو بے تاب دیکھا ہے

baghal mein ham ne rat ik ghairat-e-mahtab dekha hai

tumhen is khwab ki taabir ho kya khwab dekha hai

tarap bijli ki bhi dekhi hai wo dil tham lete hain

tiri be tabiyon ko bhi dil-e-be tab dekha hai

wo ulfat dost hun naseh dua hi dil se nikli hai

agar dushman ke ghar bhi majma-e-ahbab dekha hai

khuda ke samne ai mohtasib sach bolna hoga

mire saghar mein mai dekhi hai ya khun nab dekha hai

mubarak iztirab-e-shauq ka alam nahin chhupta

ke jab dekha hai ham ne ap ko be tab dekha hai