بشر روز ازل سے شیفتہ ہے شان و شوکت کا

بشر روز ازل سے شیفتہ ہے شان و شوکت کا

عناصر کے مرقع میں بھرا ہے نقش دولت کا

ازل کے دن سے غم مشتاق تھا جو میری خلقت کا

بنایا آنسوؤں سے گوندھ کر پتلا کدورت کا

مقدر نے دیا ہے ہاتھ میں کاسہ ہلاکت کا

گدا ہوں اس پری پیکر کا جو ٹکڑا ہے آفت کا

رہے سینہ سپر ہر دم یہ جوہر ہے محبت کا

کبھی لوہا نہ مانا یار کی تیغ عداوت

دکھایا اس نے بن ٹھن کر وہ جلوہ اپنی صورت کا

کہ پانی پھر گیا آئینے پر دریاے حیرت کا

خدا آباد رکھے لکھنؤ کے خوش مزاجوں کو

ہر اک گھر خانۂ شادی ہے ہر کوچہ ہے عشرت کا

شب وصلت تو جاتے جاتے اندھا کر گئی مجھ کو

تم اب بہرا کرو صاحب سنا کر نام رخصت کا

مرے جس پر نہ چار آنسو بہائے اس نے مردے پر

ہوا ثابت کہ پانی بہہ گیا چشم مروت کا

جلائے دوست یا ٹھنڈا کرے دل جو رضا اس کی

نہ دوزخ سے مجھے نفرت نہ میں مشتاق جنت کا

نہ ہوگا فرق نقطے کا ملا کر دیکھ لے کوئی

مرے اعمال نامے سے نوشتہ میری قسمت کا

جو شامل ہے کرم اس کا تو کیا غم کشت عقبیٰ کا

سیہ نامی سے اپنے کام لوں گا ابر رحمت کا

خدا نے دی ہے لذت غم خوری کی خوش مذاقوں کو

لہو کی گھونٹ پینے میں مزا ملتا ہے شربت کا

ہر اک تصویر ہے ثانیٔ یوسف اپنے عالم میں

ذرا یعقوب دیکھے تو مرقع اس کی قدرت کا

ید بیضا کے دستے آگے آگے لے چلے موسیٰ

شب معراج کو روشن ہوا حال اس کی عظمت کا

زیادہ چاند سورج سے ترا نور آشکارا ہے

نہ دیکھیں تیرا جلوہ ہم قصور اپنی بصارت کا

وہ عالم ہے نہ غم سے غم نہ شادی سے مجھے شادی

برابر میرے میزاں میں ہے پلہ رنج و راحت کا

تمہاری فتنۂ قامت نے ایسا رعب باندھا ہے

قدم بھر بھی قدم آ کے نہیں بڑھتا قیامت کا

شہیدان خدا مجھ کو بھی تھوڑی سے جگہ دینا

نہ ہو برباد میری خاک صدقہ اپنی تربت کا

شب وصل صنم کا خاتمہ بالخیر ہو یا رب

نہ آنکھوں پر کہیں پھر جائے چونا صبح فرقت کا

حلاوت زندگی کی ہے ملاقات احبا میں

مزا مردے کو تنہائی کا ہے زندے کو صحبت کا

مزا عشق حقیقی میں نہ کچھ عشق مجازی میں

خدا سے غم دوئی کا ہے صنم سے رنج فرقت کا

چھری نا قدردانوں کی رواں ہے اہل جوہر پر

کفن کو یاد کرنا بحرؔ دھیان آئے جو خلقت کا

bashar roz-e-azal se shefta hai shan-o-shaukat ka

anasir ke muraqqaa mein bhara hai naqsh daulat ka

azal ke din se gham mushtaq tha jo meri khilqat ka

banaya ansuon se gundh kar putla kudurat ka

muqaddar ne diya hai hath mein kasa halakat ka

gada hun us pari paikar ka jo tukra hai afat ka

rahe sina sipar har dam ye jauhar hai mohabbat ka

kabhi loha na mana yar ki tegh adawat

dikhaya us ne ban than kar wo jalwa apni surat ka

ke pani phir gaya aine par dariya-e-hairat ka

khuda abad rakhe lakhnau ke khush mizajon ko

har ik ghar khana-e-shadi hai har kucha hai ishrat ka

shab-e-waslat to jate jate andha kar gai mujh ko

tum ab bahra karo sahab suna kar nam rukhsat ka

mire jis par na char ansu bahae us ne murde par

hawa sabit ke pani bah gaya chashm-e-murawwat ka

jalae dost ya thanda kare dil jo raza us ki

na dozakh se mujhe nafrat na main mushtaq jannat ka

na hoga farq nuqte ka mila kar dekh le koi

mire aamal name se nawashta meri qismat ka

jo shamil hai karam us ka to kya gham kisht-e-uqba ka

siyah nami se apne kam lunga abr-e-rahmat ka

khuda ne di hai lazzat-e-gham khuri ki khush mazaqon ko

lahu ki ghunt pine mein maza milta hai sharbat ka

har ik taswir hai sani-e-yusuf apne alam mein

zara yaaqub dekhe to muraqqaa us ki qudrat ka

yad-e-baiza ke diste age age le chale musa

shab-e-meraj ko raushan hua hal us ki azmat ka

ziyada chand suraj se tira nur ashkara hai

na dekhen tera jalwa ham qusur apni basarat ka

wo alam hai na gham se gham na shadi se mujhe shadi

barabar mere mizan mein hai palla ranj-o-rahat ka

tumhari fitna-e-qamat ne aisa rob bandha hai

qadam bhar bhi qadam a ke nahin barhta qayamat ka

shahidan-e-khuda mujh ko bhi thori se jagah dena

na ho barbad meri khak sadqa apni turbat ka

shab-e-wasl sanam ka khatima bilkhair ho ya rab

na ankhon par kahin phir jae chuna subh furqat ka

halawat zindagi ki hai mulaqat ahba mein

maza murde ko tanhai ka hai zinde ko sohbat ka

maza ishq-e-haqiqi mein na kuchh ishq-e-majazi mein

khuda se gham dui ka hai sanam se ranj-e-furqat ka

chhuri na qadrdanon ki rawan hai ahl-e-jauhar par

kafan ko yad karna bahr dhyan ae jo khilqat ka