Arooz is now on the App Store, for iPhone and iPad. Download →

All poetry

بلبل کو خار خار دبستاں ہے ان دنوں

Haidar Ali Aatish (1778–1847)

بلبل کو خار خار دبستاں ہے ان دنوں

ہر طفل کی بغل میں گلستاں ہے ان دنوں

زنار عشق بت میں رگ جاں ہے ان دنوں

ناقوس برہمن دل نالاں ہے ان دنوں

آباد میرا خانۂ ویراں ہے ان دنوں

سیلاب مجھ غریب کا مہماں ہے ان دنوں

دامن ہے اپنے ہاتھ میں اک رشک ماہ کا

پیش نظر ہلال گریباں ہے ان دنوں

باغ جہاں میں جو ہے گرفتار ہے ترا

آزاد ایک سرو گلستاں ہے ان دنوں

کہتے ہیں ہم زمین میں مجنوں کی اب غزل

ہر بیت اپنی خانۂ زنداں ہے ان دنوں

کافر ہو اے صنم جو خریدے نہ تو اسے

مہندی کے مول خون مسلماں ہے ان دنوں

ہنگامہ حسن و عشق کا ہے گرم آج کل بہت

مستی کا ان لبوں کے فسانہ کہاں نہیں

مجلس نہیں وہ جو نہیں حیراں ہے ان دنوں

صدقے چکور ہوتے ہیں رخسار یار کے

وہ ماہ چار دہ مہ تاباں ہے ان دنوں

آتا ہے سیر باغ کو وہ گوہر مراد

پھیلائے گل کے پاس جو داماں ہے ان دنوں

قد سرو چہرہ گل ہے تو سنبل ہیں موئے یار

گھر خانہ باغ ہے جو وہ مہماں ہے ان دنوں

جوہر شناس جمع ہیں آتشؔ ہے معرکہ

شمشیر ہے وہی کہ جو عریاں ہے ان دنوں