اے دل اب عشق کی لے گوئی اور چوگان میں آ

اے دل اب عشق کی لے گوئی اور چوگان میں آ

بے خطر ٹھوک کے خم جنگ کے سامان میں آ

خوف غماز رقیبوں کا نہ کر کچھ ہرگز

ہو کے راضی بہ رضا وقت ہے میدان میں آ

فرصت اس وقت غنیمت ہے نکل ظلمت سے

سلجھ کر زلف سے رخسار درخشان میں آ

گل رخسارہ کا نظارہ تو کر آنکھیں کھول

انگبیں چکھنے کو پھر دل لب خندان میں آ

بعد اس کے جو اگر سمجھے مناسب اے دل

قید ہونے کے تئیں چاہ زنخدان میں آ

ہرزہ پھرنے سے ترے گوشہ نشینی بہتر

وہم و شک اور گماں چھوڑ کے ایقان میں آ

وصل و ہجرت کے تئیں ایک سمجھ افریدیؔ

عقل ہے کچھ بھی اگر صحبت رندان میں آ

ai dil ab ishq ki le goi aur chaugan mein a

be khatar thok ke kham jang ke saman mein a

khauf-e-ghammaz raqibon ka na kar kuchh hargiz

ho ke razi ba raza waqt hai maidan mein a

fursat is waqt ghanimat hai nikal zulmat se

sulajh kar zulf se rukhsar darakhshan mein a

gul-e-rukhsara ka nazzara to kar ankhen khol

angbin chakhne ko phir dil lab-e-khandan mein a

baad us ke jo agar samjhe munasib ai dil

qaid hone ke tain chah-e-zanakhdan mein a

harza phirne se tire gosha nashini behtar

wahm-o-shak aur guman chhor ke iqan mein a

wasl-o-hijrat ke tain ek samajh afredi

aql hai kuchh bhi agar sohbat-e-rindan mein a