اے بد گماں ترا ہے گماں اور کی طرف

اے بد گماں ترا ہے گماں اور کی طرف

میرا ترے سوا نہیں دھیاں اور کی طرف

ناوک مجھے رقیب کو برچھی لگائیے

تیر اس طرف چلے تو سناں اور کی طرف

مجھ کو سنا کے غیر کے اوپر پلٹ پرو

پلٹو جو گفتگو میں زباں اور کی طرف

حور و پری پہ کیا ہے ہمارا سوائے یار

دل اور کی طرف ہے نہ جاں اور کی طرف

گھر دل میں تو ہمارے خدا کے لیے نہ لے

اے خانماں خراب مکاں اور کی طرف

ہم فاقہ مست رزق مقدر پہ شاد ہیں

بھیجے خدا طعام کے خواں اور کی طرف

اردو میں مصحفیؔ کو بھی استاد کہہ کے شادؔ

آوازہ کس گیا یہ جواں اور کی طرف

ai bad guman tira hai guman aur ki taraf

mera tire siwa nahin dhiyan aur ki taraf

nawak mujhe raqib ko barchhi lagaiye

tir is taraf chale to sinan aur ki taraf

mujh ko suna ke ghair ke upar palat piro

palto jo guftugu mein zaban aur ki taraf

hur-o-pari pe kya hai hamara siwae yar

dil aur ki taraf hai na jan aur ki taraf

ghar dil mein to hamare khuda ke liye na le

ai khanuman kharab makan aur ki taraf

ham faqa mast rizq-e-muqaddar pe shad hain

bheje khuda taam ke khwan aur ki taraf

urdu mein mushafi ko bhi ustad kah ke shad

awaza kis gaya ye jawan aur ki taraf