انہیں لوگوں کی بدولت یہ حسیں اچھے ہیں

انہیں لوگوں کی بدولت یہ حسیں اچھے ہیں

چاہنے والے ان اچھوں سے کہیں اچھے ہیں

کوچۂ یار سے یا رب نہ اٹھانا ہم کو

اس برے حال میں بھی ہم تو یہیں اچھے ہیں

نہ کوئی داغ نہ دھبا نہ حرارت نہ تپش

چاند سورج سے بھی یہ ماہ جبیں اچھے ہیں

کوئی اچھا نظر آ جائے تو اک بات بھی ہے

یوں تو پردے میں سبھی پردہ نشیں اچھے ہیں

تیرے گھر آئیں تو ایمان کو کس پر چھوڑیں

ہم تو کعبے ہی میں اے دشمن دیں اچھے ہیں

ہیں مزے حسن و محبت کے انہیں کو حاصل

آسماں والوں سے یہ اہل زمیں اچھے ہیں

ایک ہم ہیں کہ جہاں جائیں برے کہلائیں

ایک وہ وہ ہیں کہ جہاں جائیں وہیں اچھے ہیں

کوچۂ یار سے محشر میں بلاتا ہے خدا

کہہ دو مضطرؔ کہ نہ آئیں گے یہیں اچھے ہیں

unhen logon ki badaulat ye hasin achchhe hain

chahne wale in achchhon se kahin achchhe hain

kucha-e-yar se ya rab na uthana ham ko

is bure hal mein bhi ham to yahin achchhe hain

na koi dagh na dhabba na hararat na tapish

chand suraj se bhi ye mah-e-jabin achchhe hain

koi achchha nazar a jae to ik bat bhi hai

yun to parde mein sabhi parda nashin achchhe hain

tere ghar aen to iman ko kis par chhoren

ham to kaabe hi mein ai dushman den achchhe hain

hain maze husn-o-mohabbat ke unhen ko hasil

asman walon se ye ahl-e-zamin achchhe hain

ek ham hain ke jahan jaen bure kahlaen

ek wo wo hain ke jahan jaen wahin achchhe hain

kucha-e-yar se mahshar mein bulata hai khuda

kah do muztar ke na aenge yahin achchhe hain