اے جنوں پھر مرے سر پر وہی شامت آئی

اے جنوں پھر مرے سر پر وہی شامت آئی

پھر پھنسا زلفوں میں دل پھر وہی آفت آئی

مر کے بھی جذب دل قیس میں تاثیر یہ تھی

خاک اڑاتی ہوئی لیلیٰ سر تربت آئی

مسجدیں شہر کی اے پیر مغاں خالی ہیں

مے کدے میں تو جماعت کی جماعت آئی

وہ ہے کھڑکی میں ادھر بھیڑ نظر بازوں کی

آج اس کوچہ میں سنتے ہیں قیامت آئی

کبھی جی بھر کے وطن میں نہ رہے ہم آسیؔ

روز میلاد سے تقدیر میں غربت آئی

ai junun phir mire sar par wahi shamat ai

phir phansa zulfon mein dil phir wahi afat ai

mar ke bhi jazb-e-dil-e-qais mein tasir ye thi

khak urati hui laila sar-e-turbat ai

masjiden shahr ki ai pir-e-mughan khali hain

mai kade mein to jamaat ki jamaat ai

wo hai khirki mein idhar bhir nazar bazon ki

aj us kucha mein sunte hain qayamat ai

kabhi ji bhar ke watan mein na rahe ham asi

roz-e-milad se taqdir mein ghurbat ai