اے آرزوئے قتل ذرا دل کو تھامنا

اے آرزوئے قتل ذرا دل کو تھامنا

مشکل پڑا مرا مرے قاتل کو تھامنا

تاثیر بیقراری ناکام آفریں

ہے کام ان سے شوخ شمائل کو تھامنا

دیکھے ہے چاندنی وہ زمیں پر نہ گر پڑے

اے چرخ اپنے تو مہ کامل کو تھامنا

مضطر ہوں کس کا طرز سخن سے سمجھ گیا

اب ذکر کیا ہے سامع عاقل کو تھامنا

ہو صرصر فغاں سے نہ کیونکر وہ مضطرب

مشکل ہوا ہے پردۂ محمل کو تھامنا

سیکھے ہیں مجھ سے نالۂ نے آسماں شکن

صیاد اب قفس میں عنادل کو تھامنا

یہ زلف خم بہ خم نہ ہو کیا تاب غیر ہے

تیرے جنوں زدے کی سلاسل کو تھامنا

اے ہمدم آہ تلخی ہجراں سے دم نہیں

گرتا ہے دیکھ جام ہلاہل کو تھامنا

سیماب وار مر گئے ضبط قلق سے ہم

کیا قہر ہے طبیعت مائل کو تھامنا

آغوش گور ہو گئی آخر لہولہان

آساں نہیں ہے آپ کے بسمل کو تھامنا

سینہ پہ ہاتھ دھرتے ہی کچھ دم پہ بن گئی

لو جان کا عذاب ہوا دل کو تھامنا

باقی ہے شوق چاک گریباں ابھی مجھے

بس اے رفوگر اپنی انامل کو تھامنا

مت مانگیو امان بتوں سے کہ ہے حرام

مومنؔ زبان بیہودہ سائل کو تھامنا

ai arzu-e-qatl zara dil ko thamna

mushkil para mira mire qatil ko thamna

tasir beqarari nakam afrin

hai kam un se shokh shamail ko thamna

dekhe hai chandni wo zamin par na gir pare

ai charkh apne to mah-e-kamil ko thamna

muztar hun kis ka tarz-e-sukhan se samajh gaya

ab zikr kya hai same-e-aqil ko thamna

ho sarsar-e-fughan se na kyunkar wo muztarib

mushkil hua hai parda-e-mahmil ko thamna

sikhe hain mujh se nala-e-ne asman shikan

sayyad ab qafas mein anadil ko thamna

ye zulf-e-kham ba kham na ho kya tab ghair hai

tere junun zide ki salasil ko thamna

ai hamdam ah talkhi-e-hijran se dam nahin

girta hai dekh jam-e-halahal ko thamna

simab war mar gae zabt-e-qalaq se ham

kya qahr hai tabiat-e-mail ko thamna

aghosh-e-gor ho gai akhir lahuluhan

asan nahin hai ap ke bismil ko thamna

sina pe hath dharte hi kuchh dam pe ban gai

lo jan ka azab hua dil ko thamna

baqi hai shauq chak-e-gareban abhi mujhe

bas ai rafugar apni anamil ko thamna

mat mangiyo aman buton se ke hai haram

momin zaban-e-behoda sail ko thamna