Arooz is now on the App Store, for iPhone and iPad. Download →

All poetry

اے سبط مصطفےٰ کے تجھ کو سلام پہنچے

Mir Taqi Mir (1723–1810)

اے سبط مصطفےٰ کے تجھ کو سلام پہنچے

اے جان مرتضےٰ کے تجھ کو سلام پہنچے

اے حکم کش قضا کے تجھ کو سلام پہنچے

اے غمزدہ سدا کے تجھ کو سلام پہنچے

بابا شہ ولایت نانا کی خلق امت

دریا کنارے اترے سارے وہ بے مروت

تو تشنہ کام تنہا یہ رنج یہ مصیبت

اے مبتلا بلا کے تجھ کو سلام پہنچے

بیٹے بھتیجے بھائی یار و رفیق سارے

ساقی کوثر آگے کیا تشنہ لب سدھارے

پانی جو تونے مانگا سو تیر تجھ کو مارے

اے خستہ دل جفا کے تجھ کو سلام پہنچے

اللہ ری تیری عزت مرنا جو تونے ٹھانا

زنہار منھ نہ پھیرا گو پھر گیا زمانہ

آتا ہے کس سے ایسا بیکس ہو مارے جانا

اے دل زدہ رضا کے تجھ کو سلام پہنچے

برسا کی تیغ لیکن تونے سپر نہ رکھی

دریا بہا کیا پر تونے نظر نہ رکھی

کیا کہیے جب توجہ ٹک جان پر نہ رکھی

کشتہ ہیں اس وفا کے تجھ کو سلام پہنچے

تسلیم کا رضا کا دیکھا ترا عجب ڈھب

وقت بریدن سر سجدے میں تھا مودب

یہ بندگی الٰہی یہ انکسار یارب

اے شوق کش خدا کے تجھ کو سلام پہنچے

مجلس میں گر پڑا تھا گرم آش کا پیالہ

چھینٹیں پڑیں جو تجھ پر سہما وہ لانے والا

غصے کو کھا گیا تو منھ سے نہ کچھ نکالا

اے صاحب اس حیا کے تجھ کو سلام پہنچے

تعریف سے ہے باہر سید ترا یہ ساکا

شائستہ معرکے میں تو ہی تھا اپنی جا کا

اب نقش ہے دلوں پر تیرے ثبات پا کا

اے باب صد ثنا کے تجھ کو سلام پہنچے

درویش بے بضاعت ہے میرؔ دست کوتہ

غیر از سلام تحفہ رکھتا نہیں ہے کچھ وہ

ہر لحظہ اور ہر دم ہر گاہ اور بے گہ

اے شاہ دوسرا کے تجھ کو سلام پہنچے