اے صبا جذب پہ جس دم دل ناشاد آیا

اے صبا جذب پہ جس دم دل ناشاد آیا

اپنی آغوش میں اڑ کر وہ پری زاد آیا

محو ابرو کے لئے خنجر فولاد آیا

ذبح کرنا بھی نہ تجھ کو مرے جلاد آیا

سرکشی پر جو وہ سرو ستم ایجاد آیا

پاس آرے کے گھسٹتا ہوا شمشاد آیا

چشم موسیٰ ہمہ تن بن گیا میں حیرت سے

دیکھا اک بت کا وہ عالم کہ خدا یاد آیا

دم آغاز جنوں طوق گلو گیر ہوا

غل مچانے بھی نہ پائے تھی کہ حداد آیا

کٹ گئے مارے خجالت کے جوانان چمن

باڑھ پر قد جو ترا او ستم ایجاد آیا

عاشقوں سے نہ رہا کوئی زمانہ خالی

کبھی وامق کبھی مجنوں کبھی فرہاد آیا

دل میں اک درد اٹھا آنکھوں میں آنسو بھر آئے

بیٹھے بیٹھے ہمیں کیا جانئے کیا یاد آیا

روئے غربت میں ہجوم گل صحرائی پر

چمن‌ مجمع یاران وطن یاد آیا

مژۂ یار کے نشتر کے ہوئے سودائی

خون‌ فاسد کی طرح جوش میں فصاد آیا

بن گیا خال جبین کوکب بخت یوسف

کس ترقی پہ ترا حسن خداداد آیا

عارض صاف کا کھینچا نہ گیا جب نقشہ

آئنہ لے کے ترے سامنے بہزاد آیا

بیت ہستی کے صباؔ ہو گئے معنی روشن

خواجہ آتشؔ سا زمانے میں جو استاد آیا

ai saba jazb pe jis dam dil-e-nashad aya

apni aghosh mein ur kar wo pari zad aya

mahw-e-abru ke liye khanjar-e-faulad aya

zabh karna bhi na tujh ko mire jallad aya

sarkashi par jo wo sarw sitam ijad aya

pas are ke ghisatta hua shamshad aya

chashm-e-musa hama tan ban gaya main hairat se

dekha ik but ka wo alam ke khuda yad aya

dam-e-aghaz-e-junun tauq-e-galo gir hua

ghul machane bhi na pae thi ke haddad aya

kat gae mare khijalat ke jawanan-e-chaman

barh par qad jo tira o sitam ijad aya

ashiqon se na raha koi zamana khali

kabhi wamiq kabhi majnun kabhi farhad aya

dil mein ik dard utha ankhon mein ansu bhar ae

baithe baithe hamen kya janiye kya yad aya

ru-e-ghurbat mein hujum-e-gul-e-sahrai par

chaman majmaa yaran-e-watan yad aya

mizha-e-yar ke nashtar ke hue saudai

khun-e-fasid ki tarah josh mein fassad aya

ban gaya khal-e-jabin-e-kaukab-e-bakht-e-yusuf

kis taraqqi pe tira husn-e-khudadad aya

ariz-e-saf ka khincha na gaya jab naqsha

aina le ke tire samne behzad aya

bit hasti ke saba ho gae maani raushan

khwaja atish sa zamane mein jo ustad aya