اے صنم وصل کی تدبیروں سے کیا ہوتا ہے

اے صنم وصل کی تدبیروں سے کیا ہوتا ہے

وہی ہوتا ہے جو منظور خدا ہوتا ہے

نہیں بچتا نہیں بچتا نہیں بچتا عاشق

پوچھتے کیا ہو شب ہجر میں کیا ہوتا ہے

بے اثر نالے نہیں آپ کا ڈر ہے مجھ کو

ابھی کہہ دیجیے پھر دیکھیے کیا ہوتا ہے

کیوں نہ تشبیہ اسے زلف سے دیں عاشق زار

واقعی طول شب ہجر بلا ہوتا ہے

یوں تکبر نہ کرو ہم بھی ہیں بندے اس کے

سجدے بت کرتے ہیں حامی جو خدا ہوتا ہے

برقؔ افتادہ وہ ہوں سلطنت عالم میں

تاج سر عجز سے نقش کف پا ہوتا ہے

ai sanam wasl ki tadbiron se kya hota hai

wahi hota hai jo manzur-e-khuda hota hai

nahin bachta nahin bachta nahin bachta ashiq

puchhte kya ho shab-e-hijr mein kya hota hai

be asar nale nahin ap ka dar hai mujh ko

abhi kah dijiye phir dekhiye kya hota hai

kyun na tashbih use zulf se den ashiq-e-zar

waqai tul-e-shab-e-hijr bala hota hai

yun takabbur na karo ham bhi hain bande us ke

sajde but karte hain hami jo khuda hota hai

barq uftada wo hun saltanat-e-alam mein

taj-e-sar ijz se naqsh-e-kaf-e-pa hota hai