اے مرد خدا ہو تو پرستار بتاں کا — تاباں عبد الحی (Taban Abdul Hai)

اے مرد خدا ہو تو پرستار بتاں کا

مذہب میں مرے کفر ہے انکار بتاں کا

لگتی وہ تجلی شرر سنگ کے مانند

موسی تو اگر دیکھتا دیدار بتاں کا

گردن میں مرے طوق ہے زنار کے مانند

ہوں عشق میں ازبسکہ گنہ گار بتاں کا

دونوں کی ٹک اک سیر کر انصاف سے اے شیخ

کعبے سے ترے گرم ہے بازار بتاں کا

دوں ساری خدائی کو عوض ان کے میں تاباںؔ

کوئی مجھ سا بتا دے تو خریدار بتاں کا