اور ان آنکھوں نے میرے دل کی حالت زار کی

اور ان آنکھوں نے میرے دل کی حالت زار کی

ہو نہیں سکتی دوا بیمار سے بیمار کی

مہر کی ان پر ضرورت کیا ہے اے پیر مغاں

ایک اک خم پر لگی ہے آنکھ ہر مے خوار کی

خیر ہو یارب کہیں وہ خود نہ بن جائیں رقیب

آئینے پر آج پڑتی ہیں نگاہیں پیار کی

خون کر کے دل ہمارا پھر گئی وہ مست آنکھ

ایک ہی چلو میں نیت بھر گئی مے خوار کی

دید کے طالب تھے موسیٰ طور کو تھی کیا خبر

پھونک کر رکھ دے گی بجلی جلوۂ دیدار کی

جلوۂ محبوب سے خالی نہ دیکھا دل کوئی

آئینے ہیں سیکڑوں اور ایک صورت یار کی

ہو سبک رفتار کتنی ہی نسیم صبح دم

آنکھ کھل جاتی ہے پھر بھی نرگس بیمار کی

دختر رز نے دیے چھینٹے کچھ ایسے ساقیا

پانی پانی ہو گئی توبہ ہر اک مے خوار کی

کچھ پھلے پھولے نہ یہ نازک مضامیں اے جلیلؔ

بے کھلے مرجھا گئیں کلیاں مرے گل زار کی

aur in ankhon ne mere dil ki halat zar ki

ho nahin sakti dawa bimar se bimar ki

mehr ki un par zarurat kya hai ai pir-e-mughan

ek ik kham par lagi hai ankh har mai khwar ki

khair ho yarab kahin wo khud na ban jaen raqib

aine par aj parti hain nigahen pyar ki

khun kar ke dil hamara phir gai wo mast ankh

ek hi chalo mein niyyat bhar gai mai khwar ki

did ke talib the musa tur ko thi kya khabar

phunk kar rakh degi bijli jalwa-e-didar ki

jalwa-e-mahbub se khali na dekha dil koi

aine hain saikron aur ek surat-e-yar ki

ho subuk raftar kitni hi nasim-e-subh dam

ankh khul jati hai phir bhi nargis-e-bimar ki

dukhtar-e-raz ne diye chhinte kuchh aise saqiya

pani pani ho gai tauba har ik mai khwar ki

kuchh phale phule na ye nazuk mazamin ai jalil

be khule murjha gain kaliyan mire gul zar ki