انہیں عادت ہمیں لذت ستم کی

انہیں عادت ہمیں لذت ستم کی

ادھر شمشیر ادھر تقدیر چمکی

کہوں کیا درد دل کب سے بڑھا ہے

نگاہ لطف تم نے جب سے کم کی

قدم چومیں گے تیرے ہو کے پامال

چلیں گے چال ہم نقش قدم کی

یہاں تک ان کے وعدے جھوٹ نکلے

قسم کو بھی ہوئی حاجت قسم کی

وہ زلف مشک بو بکھری ہوئی تھی

کھلی چوری نسیم صبح دم کی

یہاں تک ان کو پاس راز خط تھا

کہ خامے کی زباں پہلے قلم کی

زمیں پر اس ادا سے پاؤں رکھا

کہ آنکھیں کھل گئیں نقش قدم کی

کہاں پیری میں وہ روشن بیانی

زباں تو ہے چراغ صبح دم کی

کہاں ہم اور کہاں بخشش ہماری

جلیلؔ اک موج بھی ابر کرم کی

unhen adat hamen lazzat sitam ki

idhar shamshir idhar taqdir chamki

kahun kya dard-e-dil kab se barha hai

nigah-e-lutf tum ne jab se kam ki

qadam chumenge tere ho ke pamal

chalenge chal ham naqsh-e-qadam ki

yahan tak un ke waade jhut nikle

qasam ko bhi hui hajat qasam ki

wo zulf-e-mushk bu bikhri hui thi

khuli chori nasim-e-subh dam ki

yahan tak un ko pas-e-raz khat tha

ke khame ki zaban pahle qalam ki

zamin par is ada se paon rakha

ke ankhen khul gain naqsh-e-qadam ki

kahan piri mein wo raushan bayani

zaban to hai charagh-e-subh dam ki

kahan ham aur kahan bakhshish hamari

jalil ik mauj bhi abr-e-karam ki