اک پری کا پھر مجھے شیدا کیا

اک پری کا پھر مجھے شیدا کیا

عشق نے پھر مفسدہ برپا کیا

آج پھر اس شوخ نے فقرا کیا

وعدۂ امروز بھی فردا کیا

خون ناحق اک مسلماں کا کیا

کیا غضب او شوخ بے پروا کیا

دل کو مائل شعلہ رویوں کا کیا

دین زردشتی کو پھر احیا کیا

ابر اکثر اس برس برسا کیا

کیا تتبع دیدۂ تر کا کیا

کیوں اجل کیا تجھ کو بھی موت آ گئی

اس قدر آنے میں کیوں عرصہ کیا

کان کی بجلی جو یاد آئی تری

برق کے مانند میں تڑپا کیا

وہ کف پائے حنائی کر کے یاد

ہجر کی شب ایڑیاں رگڑا کیا

اس کو بھی سکتہ ہوا دیکھ آئینہ

دیر تک حیرت سے منہ دیکھا کیا

خاک چھانی مدتوں تنکے چنے

کیا کہوں اس عشق میں کیا کیا کیا

کل نہ پاؤ گے ہمیں کہیو سفیر

آج آنے میں اگر حیلہ کیا

واں ہوئے مسی سے لب ان کے کبود

پیٹ کر منہ ہم نے یاں نیلا کیا

تب اٹھے ہیں ان بتوں کے ہم سے ناز

جب کلیجا اپنا پتھر کا کیا

ہے گرہ موئے کمر کی ناف یار

فکر نے اپنے یہ عقدہ وا کیا

لاگ پیدا کر کے اب جلاد سے

جان کھوئی ہائے دل نے کیا کیا

ڈنٹر پہ باندھا ہم نے جوشن کی طرح

حرز جاں قاتل ترا چھلا کیا

مجھ کو مجنوں کر دیا مانند قیس

سحر کچھ اور غیرت لیلیٰ کیا

معرکہ میں عشق کے سرکا نہ پاؤں

آبرو کو جان کو صدقہ کیا

سوز فرقت نے شرارت مجھ سے کی

ہیزم تر کی طرح سلگا کیا

اے شب فرقت نہ کر مجھ پر عذاب

میں نے تیرا منہ نہیں کالا کیا

زلف جاناں جس نے دیکھی ایک بار

دل سے اپنے عمر بھر الجھا کیا

اس مصیبت سے شب فرقت کٹی

پاؤں پیٹے آہ کی نالہ کیا

عشق افشان جبین یار میں

خاک چھلنی کی طرح چھانا کیا

تھا مناسب ترک عشق یار رندؔ

آپ نے انسب کیا اولیٰ کیا

ik pari ka phir mujhe shaida kiya

ishq ne phir mafsada barpa kiya

aj phir us shokh ne fuqara kya

waada-e-imroz bhi farda kiya

khun-e-nahaq ik musalman ka kiya

kya ghazab o shokh be parwa kiya

dil ko mail shola rawiyon ka kya

din zardushti ko phir ihiya kiya

abr aksar is baras barsa kiya

kya tatabbo dida-e-tar ka kiya

kyun ajal kya tujh ko bhi maut a gai

is qadar ane mein kyun arsa kiya

kan ki bijli jo yad ai tiri

barq ke manind mein tarpa kiya

wo kaf-e-pae hinai kar ke yad

hijr ki shab eriyan ragra kiya

us ko bhi sakta hua dekh aina

der tak hairat se munh dekha kiya

khak chhani muddaton tinke chune

kya kahun is ishq mein kya kya kiya

kal na paoge hamen kahiyo safir

aj ane mein agar hila kiya

wan hue missi se lab un ke kabud

pet kar munh ham ne yan nila kiya

tab uthe hain un buton ke ham se naz

jab kaleja apna patthar ka kiya

hai girah mu-e-kamar ki naf-e-yar

fikr ne apne ye uqda wa kiya

lag paida kar ke ab jallad se

jan khoi hae dil ne kya kiya

dantar pe bandha ham ne joshan ki tarah

hirz-e-jan qatil tira chhila kiya

mujh ko majnun kar diya manind-e-qais

sehr kuchh aur ghairat-e-laila kiya

marka mein ishq ke sarka na paon

abru ko jan ko sadqa kiya

soz-e-furqat ne shararat mujh se ki

hezam tar ki tarah sulga kiya

ai shab-e-furqat na kar mujh par azab

main ne tera munh nahin kala kiya

zulf janan jis ne dekhi ek bar

dil se apne umr bhar uljha kiya

is musibat se shab-e-furqat kati

paon pite ah ki nala kiya

ishq ufshan jabin-e-yar mein

khak chhalni ki tarah chhana kiya

tha munasib tark-e-ishq-e-yar rind

ap ne ansab kiya aula kiya