اگر میں جانتا ہے عشق میں دھڑکا جدائی کا

اگر میں جانتا ہے عشق میں دھڑکا جدائی کا

تو جیتے جی نہ لیتا نام ہرگز آشنائی کا

جو عاشق صاف ہیں دل سے انہیں کو قتل کرتے ہیں

بڑا چرچا ہے معشوقوں میں عاشق آزمائی کا

کروں اک پل میں برہم کارخانے کو محبت کے

اگر عالم میں شہرہ دوں تمہاری بے وفائی کا

جفا یا مہر جو چاہے سو کر لے اپنے بندوں پر

مجھے خطرہ نہیں ہرگز برائی یا بھلائی کا

نہ پہنچا آہ و نالہ گوش تک اس کے کبھو اپنا

بیاں ہم کیا کریں طالع کی اپنے نارسائی کا

خدایا کس کے ہم بندے کہاویں سخت مشکل ہے

رکھے ہے ہر صنم اس دہر میں دعویٰ خدائی کا

خدا کی بندگی کا سوزؔ ہے دعویٰ تو خلقت کو

ولے دیکھا جسے بندہ ہے اپنی خود نمائی کا

agar main janta hai ishq mein dharka judai ka

tu jite ji na leta nam hargiz ashnai ka

jo ashiq saf hain dil se unhen ko qatl karte hain

bara charcha hai maashuqon mein ashiq azmai ka

karun ik pal mein barham karkhane ko mohabbat ke

agar alam mein shohra dun tumhari be wafai ka

jafa ya mehr jo chahe so kar le apne bandon par

mujhe khatra nahin hargiz burai ya bhalai ka

na pahuncha ah-o-nala gosh tak us ke kabhu apna

bayan ham kya karen tale ki apne narasai ka

khudaya kis ke ham bande kahawen sakht mushkil hai

rakhe hai har sanam is dahr mein daawa khudai ka

khuda ki bandagi ka soz hai daawa to khilqat ko

wale dekha jise banda hai apni khud numai ka