اگر غفلت سے باز آیا جفا کی

اگر غفلت سے باز آیا جفا کی

تلافی کی بھی ظالم نے تو کیا کی

مرے آغاز الفت میں ہم افسوس

اسے بھی رہ گئی حسرت جفا کی

کبھی انصاف ہے دیکھا نہ دیدار

قیامت اکثر اس کو میں رہا کی

فلک کے ہاتھ سے میں جا چھپوں گر

خبر لا دے کوئی تحت الثرا کی

شب وصل عدو کیا کیا جلا ہوں

حقیقت کھل گئی روز جزا کی

چمن میں کوئی اس کو سے نہ آیا

گئی برباد سب محنت صبا کی

کشاد دل پہ باندھی ہے کمر آج

نہیں ہے خیریت بند قبا کی

کیا جب التفات اس نے ذرا سا

پڑی ہم کو حصول مدعا کی

کہا ہے غیر نے تم سے مرا حال

کہے دیتی ہے بیباکی ادا کی

تمہیں شور فغاں سے میرے کیا کام

خبر لو اپنی چشم سرمہ سا کی

دیا علم و ہنر حسرت کشی کو

فلک نے مجھ سے یہ کیسی دغا کی

غم مقصد رسی تا نزع اور ہم

اب آئی موت بخت نارسا کی

مجھے اے دل تری جلدی نے مارا

نہیں تقصیر اس دیر آشنا کی

جفا سے تھک گئے تو بھی نہ پوچھا

کہ تو نے کس توقع پر وفا کی

کہا اس بت سے مرتا ہوں تو مومنؔ

کہا میں کیا کروں مرضی خدا کی

agar ghaflat se baz aya jafa ki

talafi ki bhi zalim ne to kya ki

mire aghaz-e-ulfat mein ham afsos

use bhi rah gai hasrat jafa ki

kabhi insaf hai dekha na didar

qayamat aksar us ko main raha ki

falak ke hath se main ja chhupun gar

khabar la de koi taht-e-alssara ki

shab-e-wasl-e-adu kya kya jala hun

haqiqat khul gai roz-e-jaza ki

chaman mein koi us ko se na aya

gai barbad sab mehnat saba ki

kushad-e-dil pe bandhi hai kamar aj

nahin hai khairiyat band-e-qaba ki

kiya jab iltifat us ne zara sa

pari ham ko husul-e-muddaa ki

kaha hai ghair ne tum se mira hal

kahe deti hai bebaki ada ki

tumhen shor-e-fughan se mere kya kam

khabar lo apni chashm-e-surma sa ki

diya ilm-o-hunar hasrat kashi ko

falak ne mujh se ye kaisi dagha ki

gham maqsad rassi ta nazaa aur ham

ab ai maut bakht-e-narasa ki

mujhe ai dil tiri jaldi ne mara

nahin taqsir is der ashna ki

jafa se thak gae tu bhi na puchha

ke tu ne kis tawaqqo par wafa ki

kaha us but se marta hun to momin

kaha main kya karun marzi khuda ki