اک شخص جواں خاک بسر یاد تو ہوگا

اک شخص جواں خاک بسر یاد تو ہوگا

وہ اپنی نگاہوں کا اثر یاد تو ہوگا

وہ دھوم زمانے میں مرے جوش جنوں کی

وہ غلغلۂ شام و سحر یاد تو ہوگا

بھولے تو نہ ہو گے وہ تجلی کی حکایت

وہ تذکرۂ داغ جگر یاد تو ہوگا

ہر گام پہ وہ حسن کی پر ہوش نگاہیں

وہ عشق کا بد مست سفر یاد تو ہوگا

ہر لمحہ وہ دنیائے محبت میں تغیر

ہر سانس میں وہ رنگ دگر یاد تو ہوگا

وہ دل کو ترے حسن خود آرا سے تعلق

وہ خاک سے پیمان نظر یاد تو ہوگا

وہ کارگہ دہر سے اک بے خبری سی

وہ طعنۂ ہر اہل خبر یاد تو ہوگا

وہ دید کہ تھا روکش آرائش گیتی

پہروں طرف راہگزر یاد تو ہوگا

وہ عشق کے جذبات کا بھرپور تلاطم

طوفان کی موجوں میں گزر یاد تو ہوگا

گم کردہ سکوں پا کے مجھے اپنی گلی میں

کہنا وہ تجاہل سے کدھر یاد تو ہوگا

بھولی تو نہ ہوگی مری الفت کی حقیقت

مدت کا فسانہ ہے مگر یاد تو ہوگا

ik shakhs jawan khak basar yad to hoga

wo apni nigahon ka asar yad to hoga

wo dhum zamane mein mire josh-e-junun ki

wo ghalghala-e-sham-o-sahar yad to hoga

bhule to na hoge wo tajalli ki hikayat

wo tazkira-e-dagh-e-jigar yad to hoga

har gam pe wo husn ki par hosh nigahen

wo ishq ka bad mast safar yad to hoga

har lamha wo duniya-e-mohabbat mein taghayyur

har sans mein wo rang-e-digar yad to hoga

wo dil ko tire husn-e-khud ara se taalluq

wo khak se paiman-e-nazar yad to hoga

wo karga-e-dahr se ik be khabari si

wo taana-e-har ahl-e-khabar yad to hoga

wo did ke tha rukash-e-araish giti

pahron taraf rahguzar yad to hoga

wo ishq ke jazbat ka bharpur talatum

tufan ki maujon mein guzar yad to hoga

gum karda sukun pa ke mujhe apni gali mein

kahna wo tajahul se kidhar yad to hoga

bhuli to na hogi miri ulfat ki haqiqat

muddat ka fasana hai magar yad to hoga