اک نظر میں درد کھو دینا دل بیمار کا

اک نظر میں درد کھو دینا دل بیمار کا

یہ تو ادنیٰ سا کرشمہ ہے نگاہ یار کا

غیر ممکن ہے کہ ہو پامال کوئی حشر میں

ہو نہ جب تک کچھ اشارہ آپ کی رفتار کا

حضرت آدم سے تا ایں دم ہوئے سب عشق دوست

ہے ازل سے دور دورہ حسن کی سرکار کا

ہم جو مر کر جی اٹھے اس پر تعجب کیا کہ ہے

وہ کرامت چال کی یہ معجزہ گفتار کا

آپ کے غمزے اٹھاؤں، غیر کے طعنے سنوں

بندہ پرور میں نے چھوڑا عشق بھی سرکار کا

آبلوں کو سر اٹھانے کی ذرا مہلت نہیں

ہے کرم صحرا نوردی میں یہ نوک خار کا

اس سے بڑھ کر آپ احسنؔ چاہتے ہیں اور کیا

دوستوں کی داد ہے گویا صلہ اشعار کا

ik nazar mein dard kho dena dil-e-bimar ka

ye to adna sa karishma hai nigah-e-yar ka

ghair mumkin hai ke ho pamal koi hashr mein

ho na jab tak kuchh ishara ap ki raftar ka

hazrat-e-adam se ta ain dam hue sab ishq dost

hai azal se dur daura husn ki sarkar ka

ham jo mar kar ji uthe us par taajjub kya ke hai

wo karamat chal ki ye mojiza guftar ka

ap ke ghamze uthaun, ghair ke taane sunun

banda parwar main ne chhora ishq bhi sarkar ka

ablon ko sar uthane ki zara mohlat nahin

hai karam sahra nawardi mein ye nok-e-khar ka

is se barh kar ap ahsan chahte hain aur kiya

doston ki dad hai goya sila ashar ka