اک آفت جاں ہے جو مداوا مرے دل کا

اک آفت جاں ہے جو مداوا مرے دل کا

اچھا کوئی پھر کیوں ہو مسیحا مرے دل کا

کیوں بھیڑ لگائی ہے مجھے دیکھ کے بیتاب

کیا کوئی تماشا ہے تڑپنا مرے دل کا

بازار محبت میں کمی کرتی ہے تقدیر

بن بن کے بگڑ جاتا ہے سودا مرے دل کا

گر وہ نہ ہوئے فیصلۂ حشر پہ راضی

کیا ہوگا پھر انجام خدایا مرے دل کا

کیا کوہ کن و قیس کو دیتے دم تقسیم

حصہ تھا غم حوصلہ فرسا مرے دل کا

گو میں نہ رہوں محفل جاناں میں مگر روز

تسلیمؔ یوں ہی ذکر رہے گا مرے دل کا

ik afat-e-jan hai jo mudawa mire dil ka

achchha koi phir kyun ho masiha mire dil ka

kyun bhir lagai hai mujhe dekh ke betab

kya koi tamasha hai tarapna mire dil ka

bazar-e-mohabbat mein kami karti hai taqdir

ban ban ke bigar jata hai sauda mire dil ka

gar wo na hue faisla-e-hashr pe razi

kya hoga phir anjam khudaya mire dil ka

kya koh kin-o-qais ko dete dam taqsim

hissa tha gham hausla farsa mire dil ka

go main na rahun mahfil janan mein magar roz

taslim yun hi zikr rahega mire dil ka