اپنے نالے میں گر اثر ہوتا

اپنے نالے میں گر اثر ہوتا

قطرۂ اشک بھی گہر ہوتا

جن کے نامے کی ہے پہنچ تجھ تک

کاش میں ان کا نامہ بر ہوتا

دل نہ دیتا جو میں تجھے ظالم

کیوں مری جان کا ضرر ہوتا

پھر نہ کرتا ستم کسی پہ اگر

حال سے میرے باخبر ہوتا

خون عشاق کرتے کیوں ناحق

گر بتوں کو خدا کا ڈر ہوتا

کام آتا میں ایک دن پیارے

ربط مجھ سے تجھے اگر ہوتا

کھینچتی فوج خط جو حسن پہ تیغ

سینہ میرا ہی واں سپر ہوتا

سوزؔ کو شوق کعبے جانے کا

ہے بہت پر زیادہ تر ہوتا

شیخ مانند تیرے اس کے پاس

بار برداری کو جو خر ہوتا

apne nale mein gar asar hota

qatra-e-ashk bhi guhar hota

jin ke name ki hai pahunch tujh tak

kash main un ka nama bar hota

dil na deta jo main tujhe zalim

kyun miri jan ka zarar hota

phir na karta sitam kisi pe agar

hal se mere bakhabar hota

khun-e-ushshaq karte kyun nahaq

gar buton ko khuda ka dar hota

kam ata mein ek din pyare

rabt mujh se tujhe agar hota

khinchti fauj khat jo husn pe tegh

sina mera hi wan sipar hota

soz ko shauq kaabe jane ka

hai bahut par ziyada tar hota

shaikh manind tere us ke pas

bar bardari ko jo khar hota