اپنے ہی دم سے ہے چرچا کفر اور اسلام کا

اپنے ہی دم سے ہے چرچا کفر اور اسلام کا

گاہ عابد ہوں خدا کا گہہ پجاری رام کا

لوٹتے ہیں جس کو سن سن کر ہزاروں مرغ دل

ہو رہا ہے ذکر کس کے گیسوؤں کے دام کا

چشم مست یار کا ہم چشم لو پیدا ہوا

دیکھنا اب پوست کھینچا جائے گا بادام کا

سیر کرتا ہے وہ عالم کی مرا پیک نگاہ

لاکھ ہے بے دست و پا لیکن ہے پھر سو کام کا

سر جدا تن سے کیا اک ہاتھ میں جلاد نے

نقد جاں دیجے کیا اس نے یہ کام انعام کا

ہیں شہ ملک جنوں صحرا ہے اپنا تخت گاہ

تن پہ ہر داغ جنوں سکہ ہے اپنے نام کا

جلد نام اپنا بتا دے جیسے بندہ ہوں ترا

واسطہ دیتا ہوں میں اے بت خدا کے نام کا

بت پرستی کی بہت سیاحؔ اب کر یاد حق

شغل مولا میں رہے بندہ وہی ہے کام کا

apne hi dam se hai charcha kufr aur islam ka

gah abid hun khuda ka gah pujari ram ka

lautte hain jis ko sun sun kar hazaron murgh-e-dil

ho raha hai zikr kis ke gesuon ke dam ka

chashm-e-mast-e-yar ka ham chashm lo paida hua

dekhna ab post khincha jaega badam ka

sair karta hai wo alam ki mira pik-e-nigah

lakh hai be dast-o-pa lekin hai phir so kam ka

sar juda tan se kiya ik hath mein jallad ne

naqd-e-jan dije kiya us ne ye kam inam ka

hain shah-e-mulk-e-junun sahra hai apna takht gah

tan pe har dagh-e-junun sikka hai apne nam ka

jald nam apna bata de jaise banda hun tira

wasta deta hun main ai but khuda ke nam ka

but parasti ki bahut sayyah ab kar yad-e-haq

shaghl-e-maula mein rahe banda wahi hai kam ka