اک فسانہ سن گئے اک کہہ گئے

اک فسانہ سن گئے اک کہہ گئے

میں جو رویا مسکرا کر رہ گئے

یا ترے محتاج ہیں اے خون دل

یا انہیں آنکھوں سے دریا بہہ گئے

موت ان کا منہ ہی تکتی رہ گئی

جو تری فرقت کے صدمے سہ گئے

تو سلامت ہے تو ہم اے درد دل

مر ہی جائیں گے جو جیتے رہ گئے

پھر کسی کی یاد نے تڑپا دیا

پھر کلیجہ تھام کر ہم رہ گئے

اٹھ گئے دنیا سے فانیؔ اہل ذوق

ایک ہم مرنے کو زندہ رہ گئے

ik fasana sun gae ik kah gae

main jo roya muskura kar rah gae

ya tire mohtaj hain ai khun-e-dil

ya unhen ankhon se dariya bah gae

maut un ka munh hi takti rah gai

jo tiri furqat ke sadme sah gae

tu salamat hai to ham ai dard-e-dil

mar hi jaenge jo jite rah gae

phir kisi ki yad ne tarpa diya

phir kaleja tham kar ham rah gae

uth gae duniya se fani ahl-e-zauq

ek ham marne ko zinda rah gae