اڑا سکتا نہیں کوئی مرے انداز شیون کو

اڑا سکتا نہیں کوئی مرے انداز شیون کو

بمشکل کچھ سکھایا ہے نوا سنجان گلشن کو

گریباں چاک کرنے کا سبب وحشی نے فرمایا

کہ اس کے تار لے کر میں سیوں گا چاک دامن کو

بہار آتے ہی بٹتی ہیں یہ چیزیں قید خانوں میں

سلاسل ہاتھ کو پاؤں کو بیڑی طوق گردن کو

جھڑی ایسی لگا دی ہے مرے اشکوں کی بارش نے

دبا رکھا ہے بھادوں کو بھلا رکھا ہے ساون کو

دل مرحوم کی میت اجازت دو تو رکھ دیں ہم

ترے تلوے برابر ہی زمیں کافی ہے مدفن کو

اجازت دو تو ساری انجمن کے دل ہلا دوں میں

سمجھ رکھا ہے تم نے ہیچ تاثیرات شیون کو

سلوک پیر مے خانہ کی اے ساقی تلافی کیا

بجز اس کے دعائیں دو اسے پھیلا کے دامن کو

ura sakta nahin koi mire andaz-e-shewan ko

bamushkil kuchh sikhaya hai nawa sanjan-e-gulshan ko

gareban chak karne ka sabab wahshi ne farmaya

ke us ke tar le kar main siyon ga chak-e-daman ko

bahar ate hi batti hain ye chizen qaid khanon mein

salasil hath ko paon ko beri tauq-e-gardan ko

jhari aisi laga di hai mire ashkon ki barish ne

daba rakha hai bhadon ko bhala rakha hai sawan ko

dil-e-marhum ki mayyat ijazat do to rakh den ham

tire talwe barabar hi zamin kafi hai madfan ko

ijazat do to sari anjuman ke dil hila dun main

samajh rakha hai tum ne hech tasirat shewan ko

suluk-e-pir-e-mai khana ki ai saqi talafi kya

bajuz us ke duaen do use phaila ke daman ko