اٹھا لے جائیں گلشن سے کدھر ہم آشیاں اپنا

اٹھا لے جائیں گلشن سے کدھر ہم آشیاں اپنا

ہوا ہے عین فصل گل میں دشمن باغباں اپنا

کوئی شب اور وہ رشک قمر ہے مہماں اپنا

دکھا لے چار دن کی چاندنی یہ بھی سماں اپنا

نہیں ہیں کون سی جا موت کی حسرت میں سرگرداں

فلک کرتا ہے وعدہ دیکھیے پورا کہاں اپنا

برے دن میں زمیں کب پاؤں کے نیچے ٹھہرتی ہے

کیا کرتے ہیں شکوہ ہم نہیں ہے آسماں اپنا

چمن نازاں ہے کیا اپنی بہار چند روزہ پر

لیے جاتا ہے دل شوق بہار جاوداں اپنا

پلک کو دے کے جنبش پھر گئی ہم سے جو آنکھ ان کی

ہوا پر اڑ گئی کشتی اٹھا کر بادباں اپنا

نہیں ہوش و خرد کی برہمی سودائے گیسو میں

اندھیری رات میں یہ لٹ رہا ہے کارواں اپنا

بنایا دونوں عالم سے جدا اک اور ہی عالم

جو پوچھا بے خودی سے ایک دن نام و نشاں اپنا

سمجھ رکھو وہیں وہ خود نما بھی جلوہ گر ہوگا

صفائے دل دکھاتی ہوگی آئینہ جہاں اپنا

حلاوت سے مزے سے لطف و شیرینی سے مملو ہے

زباں اپنی سخن اپنا کلام اپنا بیاں اپنا

utha le jaen gulshan se kidhar ham ashiyan apna

hua hai ain fasl-e-gul mein dushman baghban apna

koi shab aur wo rashk-e-qamar hai mehman apna

dikha le char din ki chandni ye bhi saman apna

nahin hain kaun si ja maut ki hasrat mein sargardan

falak karta hai waada dekhiye pura kahan apna

bure din mein zamin kab paon ke niche thaharti hai

kiya karte hain shikwa ham nahin hai asman apna

chaman nazan hai kya apni bahar chand roza par

liye jata hai dil shauq-e-bahar-e-jawedan apna

palak ko de ke jumbish phir gai ham se jo ankh un ki

hawa par ur gai kashti utha kar badban apna

nahin hosh-o-khirad ki barhami sauda-e-gesu mein

andheri rat mein ye lut raha hai karwan apna

banaya donon alam se juda ik aur hi alam

jo puchha be khudi se ek din nam-o-nishan apna

samajh rakho wahin wo khud numa bhi jalwa gar hoga

safa-e-dil dikhati hogi aina jahan apna

halawat se maze se lutf-o-shirini se mumilo hai

zaban apni sukhan apna kalam apna bayan apna