اپنا جہاں میں رہنا ہے یادگار رہنا

اپنا جہاں میں رہنا ہے یادگار رہنا

مشکل تھا اپنے گھر میں بیگانہ وار رہنا

اے موت رحم کر اب یہ کوئی زندگی ہے

نظروں سے اپنی گر کر دنیا پہ بار رہنا

ہاتھوں پہ سر کو رکھے ہر رند کہہ رہا ہے

بے کیف رہنے ہی تک تھا بے خمار رہنا

کس طرح میں نے مانا اے اختیار والے

میت کے مثل اپنا بے اختیار رہنا

رنگینیوں نے کس کی سکھلا دیا ہے گل کو

جب تک چمن میں رہنا بن کر بہار رہنا

ہستی کے قافلے کو اس راہزن نے لوٹا

کہتا تھا راہ بھر جو ہاں ہوشیار رہنا

بیخودؔ کی زندگی کی یہ بھی کوئی طرح تھی

بے اختیار آنا بے اختیار رہنا

apna jahan mein rahna hai yadgar rahna

mushkil tha apne ghar mein begana war rahna

ai maut rahm kar ab ye koi zindagi hai

nazron se apni gir kar duniya pe bar rahna

hathon pe sar ko rakhe har rind kah raha hai

be kaif rahne hi tak tha be khumar rahna

kis tarah main ne mana ai ikhtiyar wale

mayyat ke misl apna be ikhtiyar rahna

ranginiyon ne kis ki sukhla diya hai gul ko

jab tak chaman mein rahna ban kar bahar rahna

hasti ke qafile ko is rahzan ne lauta

kahta tha rah bhar jo han hoshyar rahna

bekhud ki zindagi ki ye bhi koi tarah thi

be ikhtiyar ana be ikhtiyar rahna