اپنی جاں بازی کا جس دم امتحاں ہو جائے گا

اپنی جاں بازی کا جس دم امتحاں ہو جائے گا

خنجر سفاک پر جوہر عیاں ہو جائے گا

آہ سوزاں کا اگر اونچا دھواں ہو جائے گا

آسماں اک اور زیر آسماں ہو جائے گا

کچھ سمجھ کر اس مۂ خوبی سے کی تھی دوستی

یہ نہ سمجھے تھے کہ دشمن آسماں ہو جائے گا

لے خبر بیمار غم کی ورنہ اے رشک مسیح

تیری فرقت میں فراق جسم و جاں ہو جائے گا

خاک کر دے گا مجھے آخر سیہ چشموں کا عشق

جسم خاکی گرد پائے آہواں ہو جائے گا

جب ادا سے وہ کرے گا قتل مجھ کو اے اثرؔ

کشتۂ شمشیر حیرت اک جہاں ہو جائے گا

apni jan bazi ka jis dam imtihan ho jaega

khanjar-e-saffak par jauhar ayan ho jaega

ah-e-sozan ka agar uncha dhuan ho jaega

asman ik aur zer-e-asman ho jaega

kuchh samajh kar us mah-e-khubi se ki thi dosti

ye na samjhe the ke dushman asman ho jaega

le khabar bimar gham ki warna ai rashk-e-masih

teri furqat mein firaq-e-jism-o-jan ho jaega

khak kar dega mujhe akhir siyah chashmon ka ishq

jism-e-khaki gard pae ahwan ho jaega

jab ada se wo karega qatl mujh ko ai asar

kushta-e-shamshir-e-hairat ik jahan ho jaega