اٹھا کر ناز سے برقع دکھا کر روئے زیبا کو

اٹھا کر ناز سے برقع دکھا کر روئے زیبا کو

تماشا کر دیا دلبر نے مجھ محو تماشا کو

مناسب تھی جو جا بس اس میں رکھے تحفۂ دلبر

نگہ میں یاس کو حسرت کو دل میں سر میں سودا کو

دکھاتی ہے مرے اشکوں کی طغیانی مجھے کیا کچھ

حباب دل کبھی دیکھا کبھی امواج دریا کو

خیال روئے زیبا میں تو دامان سحر دیکھا

شب فرقت تصور کر لیا زلف چلیپا کو

مریض ہجر تیرا میہماں ہے اب کوئی دم کا

دکھائے وقت آخر نبض اپنی کیا مسیحا کو

دل بیمار میں گھر کر لیا ہے درد نے اپنا

الٰہی میں رکھوں کس جا ان ارمان و تمنا کو

تمہیں تو اے صنم منظور اپنی پردہ پوشی تھی

دکھائی طور سینا پر تجلی کس نے موسیٰ کو

خجل کیسا کیا ہے دیدہ و دل نے فدائی کے

سبو کو جام کو مینا کو اور ساغر کو صہبا کو

چراغ عشق روشن کر دیا فرہاد و مجنوں نے

کیا آباد اس نے کوہ کو اور اس نے صحرا کو

رہا ویران بعد از مرگ حافظ ایک مدت تک

کیا آباد جا کر ہم نے گل گشت مصلےٰ کو

مرے پہلو کو موسیٰ دیکھ کر حیرت سے کہتے ہیں

چھپایا کس طرح دل میں جمیلہؔ اس تجلیٰ کو

utha kar naz se burqaa dikha kar ru-e-zeba ko

tamasha kar diya dilbar ne mujh mahw-e-tamasha ko

munasib thi jo ja bas is mein rakhe tohfa-e-dilbar

nigah mein yas ko hasrat ko dil mein sar mein sauda ko

dikhati hai mire ashkon ki tughyani mujhe kya kuchh

habab-e-dil kabhi dekha kabhi amwaj-e-dariya ko

khayal-e-ru-e-zeba mein to daman-e-sahar dekha

shab-e-furqat tasawwur kar liya zulf-e-chalepa ko

mariz-e-hijr tera mehman hai ab koi dam ka

dikhae waqt akhir nabz apni kya masiha ko

dil-e-bimar mein ghar kar liya hai dard ne apna

ilahi mein rakhun kis ja un arman-o-tamanna ko

tumhen to ai sanam manzur apni parda poshi thi

dikhai tur-e-sina par tajalli kis ne musa ko

khajil kaisa kya hai dida-o-dil ne fidai ke

subu ko jam ko mina ko aur saghar ko sahba ko

charagh-e-ishq raushan kar diya farhad-o-majnun ne

kiya abad us ne koh ko aur us ne sahra ko

raha wiran baad az marg hafiz ek muddat tak

kiya abad ja kar ham ne gul-e-gasht musalle ko

mire pahlu ko musa dekh kar hairat se kahte hain

chhupaya kis tarah dil mein jamilahu is tajalli ko