اپنی فرحت کے دن اے یار چلے آتے ہیں

اپنی فرحت کے دن اے یار چلے آتے ہیں

کیفیت پر گل رخسار چلے آتے ہیں

پڑ گئی کیا نگہ مست ترے ساقی کی

لڑکھڑاتے ہوئے مے خوار چلے آتے ہیں

یاد کیں نشہ میں ڈوبی ہوئی آنکھیں کس کی

غش تجھے اے دل بیمار چلے آتے ہیں

راہ میں صاحب اکسیر کھڑے ہیں مشتاق

خاکساران در یار چلے آتے ہیں

باغ میں پھول ہنسے دیتے ہیں بے دردی سے

نالۂ مرغ گرفتار چلے آتے ہیں

دیکھ کر ابروئے خم دار پھرے یوں عاشق

غل ہے کھائے ہوئے تلوار چلے آتے ہیں

جس طرح نرغے میں چلتے ہیں غزال صحرا

یوں تری چشم کے بیمار چلے آتے ہیں

ہوں وہ بے خود کہ یہ ہے نالۂ سوزاں پہ گماں

شعلۂ آتش رخسار چلے آتے ہیں

چاہئے شور قیامت پئے تعظیم اٹھے

آپ کے عاشق رفتار چلے آتے ہیں

شور سنتے ہیں جو ہم چاک گریبانوں کا

بند کھولے سر بازار چلے آتے ہیں

ہر طرف حشر میں جھنکار ہے زنجیروں کی

ان کی زلفوں کے گرفتار چلے آتے ہیں

چل گئی تیغ نگہ آج تعشقؔ پہ ضرور

لوگ اس کوچہ سے خوں بار چلے آتے ہیں

apni farhat ke din ai yar chale ate hain

kaifiyat par gul rukhsar chale ate hain

par gai kya nigah-e-mast tire saqi ki

larkharate hue mai khwar chale ate hain

yad kin nasha mein dubi hui ankhen kis ki

ghash tujhe ai dil-e-bimar chale ate hain

rah mein sahab-e-iksir khare hain mushtaq

khaksaran dar-e-yar chale ate hain

bagh mein phul hanse dete hain be dardi se

nala-e-murgh-e-giraftar chale ate hain

dekh kar abru-e-kham dar phire yun ashiq

ghul hai khae hue talwar chale ate hain

jis tarah narghe mein chalte hain ghazal-e-sahra

yun tiri chashm ke bimar chale ate hain

hun wo be khud ke ye hai nala-e-sozan pe guman

shola-e-atish-e-rukhsar chale ate hain

chahiye shor-e-qayamat piye taazim uthe

ap ke ashiq-e-raftar chale ate hain

shor sunte hain jo ham chak garebanon ka

band khole sar-e-bazar chale ate hain

har taraf hashr mein jhankar hai zanjiron ki

un ki zulfon ke giraftar chale ate hain

chal gai tegh-e-nigah aj taashshuq pe zarur

log us kucha se khun bar chale ate hain