ان کا یا اپنا تماشا دیکھو

ان کا یا اپنا تماشا دیکھو

جو دکھاتا ہے زمانہ دیکھو

وقت کے پاس ہیں کچھ تصویریں

کوئی ڈوبا ہے کہ ابھرا دیکھو

رنگ ساحل کا نکھر آئے گا

دو گھڑی جانب دریا دیکھو

تلملا اٹھا گھنا سناٹا

پھر کوئی نیند سے چونکا دیکھو

ہم سفر غیر ہوئے جاتے ہیں

فاصلہ رہ گیا کتنا دیکھو

برف ہو جاتا ہے صدیوں کا لہو

ایک ٹھہرا ہوا لمحہ دیکھو

رنگ اڑتے ہیں تبسم کی طرح

آئنہ خانوں کا دعویٰ دیکھو

دل کی بگڑی ہوئی صورت ہے یہاں

اب کوئی اور خرابہ دیکھو

یا کسی پردے میں گم ہو جاؤ

یا اٹھا کر کوئی پردا دیکھو

دوستی خون جگر چاہتی ہے

کام مشکل ہے تو رستہ دیکھو

سادہ کاغذ کی طرح دل چپ ہے

حاصل رنگ تمنا دیکھو

یہی تسکین کی صورت ہے تو پھر

چار دن غم کو بھی اپنا دیکھو

غم گساروں کا سہارا کب تک

خود پہ بھی کر کے بھروسا دیکھو

اپنی نیت پہ نہ جاؤ باقیؔ

رخ زمانے کی ہوا کا دیکھو

un ka ya apna tamasha dekho

jo dikhata hai zamana dekho

waqt ke pas hain kuchh taswiren

koi duba hai ke ubhra dekho

rang sahil ka nikhar aega

do ghari janib-e-dariya dekho

tilmila utha ghana sannata

phir koi nind se chaunka dekho

ham safar ghair hue jate hain

fasla rah gaya kitna dekho

barf ho jata hai sadiyon ka lahu

ek thahra hua lamha dekho

rang urte hain tabassum ki tarah

aina khanon ka daawa dekho

dil ki bigri hui surat hai yahan

ab koi aur kharaba dekho

ya kisi parde mein gum ho jao

ya utha kar koi parda dekho

dosti khun-e-jigar chahti hai

kam mushkil hai to rasta dekho

sada kaghaz ki tarah dil chup hai

hasil-e-rang-e-tamanna dekho

yahi taskin ki surat hai to phir

char din gham ko bhi apna dekho

gham gusaron ka sahara kab tak

khud pe bhi kar ke bharosa dekho

apni niyyat pe na jao baqi

rukh zamane ki hawa ka dekho